
सडकमा छाडिएका कुकुरको व्यवस्थापन चुनौती बनिरहेका बेला बागलुङ नगरपालिकाले भने कुकुरलाई आवसीय व्यवस्थापन गरेर नयाँ अभ्यास गरेको छ ।
कुकुर संरक्षण र व्यवस्थापनका लागि नयाँ अभ्यास सफल हुन थालेको छ भने १० वटाबाट सुरु भएको होस्टेलमा अहिले ३० वटा कुकुर रहेका छन् । बागलुङ बजारको सडकमा छाडिएका कुकुरलाई नियन्त्रणमा लिएर सुरक्षित आवास, खानपान र उपचारको व्यवस्था गर्न नगरपालिकाले “कुकुर होस्टेल” सञ्चालनमा ल्याएको हो ।
नगरपालिकाले पाँच महिनादेखि सामुदायिक तथा भुस्याहा कुकुरको उद्धार गरी होस्टेलमा राखेर पालनपोषण गर्दै आएको छ । स्थानीय सरकारले स्थापना गरेको नेपालकै पहिलो कुकुर होस्टेल भएको बागलुङ नगरपालिकाका नगर प्रमुख बसन्त कुमार श्रेष्ठले जानकारी दिनुभयो । यसको सञ्चालन र व्यवस्थापनबारे बुझ्न अन्य स्थानीय तहले समेत चासो देखाउन थालेको उहाँको भनाइ छ ।
“कुकुरको समस्या हाम्रो मात्रै होइन, अन्य सहरमा समेत छ, सरकारी क्षेत्रले अभियानकै रुपमा सञ्चालनमा ल्याएको पहिलो होस्टेल हो । अहिले अन्य पालिकाले समेत हेर्न आउन थालेका छन्”, नगरप्रमुख श्रेष्ठले भन्नुभयो, “हेटौडा उपमहानगरसहित स्याङ्जा र अर्घखाँचीका केही नगरपालिकाहरूले समेत कुकुर होस्टेल सञ्चालनका लागि कार्यविधि लगायत होस्टेल हेर्न आउनुभएको छ ।”
बागलङ बजारमा सामुदायिक कुकुरको संख्या बढ्दै जाँदा सर्वसाधारणलाई आवतजावतमा समस्या हुनुका साथै कुकुरको टोकाइ र सडक दुर्घटनाको जोखिम बढेको थियो । कुकुरको टोकाइबाट एक हजार ८०० जनाले रेबिजविरुद्धको खोप लगाएपछि नगरपालिकाले यसको दीर्घकालीन व्यवस्थापनका लागि होस्टेल निर्माण गरेको हो ।
नगरपालिकाले बागलुङ नगरपालिका—३ गहतेमा पाँच रोपनी सार्वजनिक जग्गामा एक करोड रुपियाँ खर्चेर होस्टेल निर्माण गरेको जनाएको छ । नवप्रवर्तन कार्यक्रमअन्तर्गत मुख्यमन्त्री तथा मन्त्रीपरिषद्को कार्यालयसँगको साझेदारीमा निर्माण गरिएको होस्टेलमा नगरपालिकाको ३५ लाख र मुख्यमन्त्री कार्यालयको ६५ लाख रुपियाँ लगानी रहेको छ ।














