चैत्र ५, २०७९ संखुवासभा — भोल्टेज नपुग्ने र बेलाबेलामा विद्युत् अवरुद्ध हुने समस्याबाट आजित बानेश्वर र तुम्लिङटारका बासिन्दाले कोशी करिडोरको सबस्टेसन सञ्चालनपछि राहत पाएका छन् । इनरुवा–तुम्लिङटार खण्ड सिंगल सर्किट प्रसारण लाइन सञ्चालनमा आए पछि स्थानीय उपभोक्तालाई राहत भएको हो ।
सबस्टेसन नहुँदा हावाहुरी र वर्षाका कारण बिजुली अनियमित हुने गरेको थियो । यसअघि जिल्लामा उत्पादन गरिएको बिजुली केन्द्रीय प्रसारण लाइनमार्फत आउँदा भोल्टेज नपुग्ने र बेलाबेलामा अवरुद्ध हुने समस्या स्थानीयले भोग्दै आएका थिए । यस करिडोरबाट पहाडी जिल्लाहरूमा उत्पादित विद्युत् राष्ट्रिय प्रसारण प्रणालीमा प्रवाह गर्न र वितरण गर्न पनि सहज भएको छ ।
संखुवासभा उद्योग वाणिज्य संघका अध्यक्ष कृष्णभगत प्रधान कोशी करिडोर सञ्चालनबाट राहत महसुस गरेको बताउँछन् । ‘दैनिक ४० पटकभन्दा बढी बिजुली जाँदा हैरान भएका थियौं,’ उनले भने, ‘अहिले समस्या धेरै हटेको छ ।’ करिब ३ महिना अघिबाट उक्त सबस्टेसन सञ्चालनमा आएको हो । पहिले सामान्य बिजुलीको पोलबाट ११ केभीएबाट सदरमुकाम खाँदबारीमा बिजुली ल्याइएको थियो । कोशी करिडोरले अहिले कम्तीमा सय फिटभन्दा अग्ला टावर राखेर तुम्लिङटारसम्म बिजुली ल्याएको छ । संखुवासभा र भोजपुरवासीले यसअघि हावाहुरीको मौसममा चैतदेखि असोजसम्म राम्ररी बिजुली बाल्न पाउँदैनथे ।
विद्युत् प्राधिकरण खाँदबारी वितरण केन्द्रका प्रमुख सञ्जीव कर्ण अहिले विद्युत् अनियमितताको समस्या हटेको बताउँछन् । ‘संखुवासभा र भोजपुरमा उत्पादन भएको स्थानीय उत्पादनसमेत यसैमा जोडिएको छ,’ उनले भने, ‘केन्द्रीय प्रसारण लाइन अवरुद्ध भएको खण्डमा हामी यहीको स्थानीय उत्पादनबाट जिल्ला उज्ज्यालो बनाउँछौं ।’
संखुवासभाका विभिन्न खोलामा उत्पादित २० मेगावाट र भोजपुरको १२ मेगावाट बिजुली यो करिडोरमा जोडिएको छ । यो बिजुली धनकुटा, भोजपुर र तेह्रथुमसम्म बाल्न मिल्ने उनले बताए । ‘पहाडी जिल्लामा हुने विद्युत् अवरोध घट्दै गइरहेको छ,’ उनले भने, ‘जिल्लाभित्र आन्तरिक समस्या आएको खण्डमा बिजुली काट्नुपर्ने हुन्छ ।’ कर्णका अनुसार मासिक र साप्ताहिक सरसफाइका बेला केही घण्टा अवरुद्ध हुन्छ । उनले भने, ‘लत्रिएका रूखका हाँगा र पात पतिंगर सफा गरिरहन्छौं, ठूलो हावापानी आयो भने मात्र समस्या हुन्छ ।’
खाँदबारीका मोबाइल व्यवसायी कृष्ण पुरीले अहिले भोल्टेज कम हुने समस्या नभएको बताउँछन् । ‘पहिले भोल्टेज नपुग्ने र दिनमा धेरैपटक अवरोध हुने समस्या थियो, यसले हामीलाई समस्यामा पारेको थियो,’ उनले भने, ‘भोल्टेज तलमाथि हुँदा धेरै सामग्री बिग्रेका थिए ।’ कोशी करिडोरको २ सय २० केभी प्रसारण लाइन आयोजनाअन्तर्गत सुनसरीको इनरुवाबाट तेह्रथुमको वसन्तपुर, संखुवासभाको बानेश्वर हुँदै तुम्लिङटारसम्मको २ सय २० केभी डबल सर्किट टावर निर्माण गरिएको छ ।
कोशी प्रदेशका भोजपुर, संखुवासभा, तेह्रथुम र ताप्लेजुङमा निर्माण हुने जलविद्युत् आयोजनाको विद्युत् राष्ट्रिय प्रसारण लाइनमा जोड्न उक्त करिडोरको निर्माण गरिएको हो । यसअघि तिरतिरे सबस्टेसनबाट बिजुली सदरमुकाम ल्याइएको थियो । लामो दूरीमा साना बिजुलीका पोलबाट तार ल्याउँदा सामान्य हावाहुरीमा पनि चुडिने र तार भुँइमा लत्रिएर धेरै अवरुद्ध हुने समस्या थियो ।
