एस् ए टी भी २० चैत्र, काठमाडौँः दुईपल्टको उपविजेता धनगढी एफसीले नेपाल सुपर लिग (एनएसएल) को तेस्रो संस्करणअन्तर्गत आफ्नो पहिलो खेलमा जित निकाल्दै सुखद सुरुआत गरेको छ।

धनगढीले मंगलबार बुटवल लुम्बिनी एफसीमाथि ४–१ को जित निकाल्दा लेबनानी स्ट्राइकर अहमद हिजाजीले उत्कृष्ट प्रदर्शन गरे। दोस्रो संस्करणमा धनगढी फाइनलमा पुग्दा उनको प्रदर्शन उत्कृष्ट थियो। यसपल्ट पनि उनले लय जारी राखे र पहिलो खेलमा नै दुई गोल पनि गर्न सफल भए।

त्रिपुरेश्वरस्थित दशरथ रंगशालामा धनगढीको जितमा हिजाजीसँगै कृतीशरत्न छुन्जु र सर्जियो बारबोजुले समान एक गोल गरे। बुटवलका लागि भने केन्टा हाराले गोल गरेका हुन्। धनगढीले पहिलो खेलबाट तीन अंक जोड्दा बुटवलको भने दुई खेलबाट एक अंक छ। पहिलो खेलमा भने बुटवलले झापा एफसीसँग गोलरहित बराबरी खेलेको थियो। तर, दोस्रो खेलमा पनि बुटवलले बराबरीको अवस्थामा ल्याए पनि जोगाउन सकेन।

खेलमा अग्रता लिएको धनगढीले चुनौती सामना गरे पनि जित निकाल्न सफल भयो। धनगढीले खेलको छैटौं मिनेटमा नै हिजाजीको गोलबाट अग्रता लियो। मोहम्मत अल जेले मध्यभागबाट दिएको बललाई बुटवलका डिफेन्डरले क्लियर गर्न सकेनन्। त्यो बललाई हिजाजीले नियन्त्रणमा लिँदै गोल गरेका हुन्।

नवौं मिनेटमा बुटवलले फ्रिकिकबाट अवसर बुने पनि सदुपयोग हुन सकेन। ३३ यार्डबाट केन्टाको फ्रिकिक पोस्टभन्दा केही माथिबाट बाहिरिन पुग्यो। दशौं मिनेटमा धनगढीका कृतीशरत्न छुन्जुको कडा प्रहार पध ोस्टनजिकैबाट बाहिरियो। २७औं मिनेटमा धनगढीले पनि राम्रो अवसर गुमायो।

जर्जप्रिन्स कार्कीको पासमा हिजाजीको सट पोलमा लागेर फर्कियो। रिबाउन्डमा कृतीशको प्रहार विमल पाण्डेले ब्लक गरिदिए। तर, बुटवलले ३१औं मिनेटमा बराबरीमा गोल फर्काउने अवसरलाई धनगढीका गोलकिपर वाइड बिरोले असफल बनाए। पेनाल्टी बक्सबाहिरबाट बुटवलका सरोज तामाङले गरेको क्रस रोक्ने धनगढीका काइसेडोको हेडर क्लियरेन्स आफ्नै पोस्टतर्फ अग्रसर थियो। तर, धनगढीका गोलकिपर वाइडले पन्च गर्दै संकट टारिदिए। लगत्तै ३२औं मिनेटमा कर्नर प्रहारमा भने बुटवल गोल गर्न सफल भयो र बराबरीमा फर्कियो। मनीष डाँगीको कर्नर प्रहारमा केन्टाले ब्याक हिलबाट बललाई जाली चुमाएका हुन्। बुटवलका सरोज तामाङले ३८औं मिनेटमा गरेको सशक्त प्रहार धनगढीका गोलकिपर वाइडले उत्कृष्ट बचाउ गरे।

उनले पेनाल्टी बक्सबाहिरबाट पहिलो बार च्याप्दै गरेको प्रहार वाइडले पन्च गर्दै असफल बनाए। त्यसपछि पहिलो हाफमा थप गोल हुन सकेन र १–१ को भयो। तर, दोस्रो हाफको अन्तिम समयमा धनगढीले दुई गोल गर्‍यो। ५७औं मिनेटमा बुटवलले राम्रो क्षेत्रबाट फ्रिकिक प्रहार गर्ने अवसर पायो। यद्यपि, सरोजले त्यो अवसर सदुपयोग गर्न सकेनन्।

धनगढीका जर्जप्रिन्सले ६७औं मिनेटमा करिब २६ यार्डबाट गरेको प्रहार दोस्रो बारनजिकबाट बाहिरिन पुग्यो। बुटवलका मनीष सेढाईले ७३औं मिनेटबाट गरेको सट माथिल्लो बारमा लागेर फर्कियो। तर, ७५औं मिनेटमा कृतीशरत्नको एकल प्रयासमा भएको उत्कृष्ट गोलबाट धनगढीले अग्रता लियो।

करिब ३५ यार्डबाट ड्रिब्लिङ गर्दै अगाडि बढेका कृतीशले बुटवलका तीन डिफेन्डरलाई छक्याउँदै उत्कृष्ट गोल गरे। धनगढीले ८६औं मिनेटमा अग्रता बढाउने राम्रो अवसर पाएको थियो। सर्जिओको कट ब्याकलाई राम वाजीको करिब १८ यार्डबाट गरेको सट पोस्टको दिशामा रहन सकेन। ९०औं मिनेटमा धनगढीको काउन्टर प्रयासमा जर्जप्रिन्सको नजिकै दूरीबाट सशक्त सट बुटवलका गोलकिपर दीप कार्कीले उत्कृष्ट बचाउ गरे।

इन्जुरी समयको छैटौं मिनेटमा हिजाजीले उत्कृष्ट गोल गर्दै धनगढीलाई जितनजिक पुर्‍याए। करिब मध्य भागबाट मोहम्मतले दिएको पास नियन्त्रणमा लिँदै हिजाजीले बुटवलका गोलकिपर दीप अगाडि बढेको अवस्थामा लेफ्ट कर्नर साइडबाट उत्कृष्ट गोल गरे।

लगत्तै धनगढीले चौथो गोल गर्दै बुटवलमाथि ४–१ को फराकिलो जित सुरक्षित ग¥यो। काउन्टर अट्याकमा भएको दोस्रो प्रयासबाट धनगढीले गोल गरेको हो। सर्जियोसँगको वान टु पासबाट जर्जप्रिन्सको पहिलो प्रहार बुटवलका गोलकिपर दीपले रोके। तर, रिबाउन्ड बललाई सर्जियोले वान टचबाट जाली चुमाए। यससँगै धनगढीले बुटवलमाथि रबाफिलो जित निकाल्यो।

हारपछि बुटवल लुम्बिनीका प्रशिक्षक पुष्पलाल शर्माले लिगमा ६ खेलमध्ये भएकाले दुई खेलबाट समान एक बराबरी र हारका कारण शीर्ष चारमा पुग्न केही दबाबमा महसुस गरेको बताए। ‘लिगमा ६ खेल मात्र छ। त्यसमा पनि हामीले एक बराबरी र हारको नतिजा बेहोरेका छौं। त्यसैले दबाब महसुस गरेका छौं। शीर्ष चारमा पुग्न बाँकी चार खेल नै जित्नुपर्नेछ। अबको खेलमा राम्रो गर्ने गरी खेल्नेछौं,’ उनले भने, ‘हामी अट्याकिङ फुटबल खेल्न चाहन्थ्यौं। तर, रणनीतिअनुरूप हुन सकेन। अबको खेलमा धेरै पक्षमा सुधार गर्नुपर्ने देखिएको छ।’

उनले बराबरीको अवस्थामा आफ्नो रणनीतिमा पनि सही नभएको उल्लेख गरे। ‘बराबरीको अवस्थामा सब्स्टिच्युट गरेर अट्याकिङ फुटबल खेल्ने रणनीति पनि सही हुन सकेन। थोरै समयको आरामपछि नै दोस्रो खेल खेल्नुपर्दा आजको खेलमा असर परेको हो। यसमा केही चोट पनि सामना गरेका छौं। त्यसैले पनि राम्रो प्रदर्शन गर्न सकेन,’ उनले भने।

धनगढीका प्रशिक्षक जुवान म्यानुएलले सुरुमा रणनीतिअनुरूप हुन नसके पनि अन्तिम समयसम्म धैर्यता राख्दा राम्रो नतिजा प्राप्त भएको बताए। ‘आजको खेल राम्रो थियो। तर, सुरुमा चाहिँ रणनीतिअनुरूप हुन सकेको थिएन। तर, अन्तिम समयसम्म धैर्य गर्दा जित सम्भव भयो,’ उनले भने।