- एनओसीको तदर्थ कमिटीलाई काम गर्न दिने उद्देश्यले सरकारले सातदोबाटोस्थित एनओसी भवनमा लगाइरहेको ताला खोलिदिएको छ ।
एस् ए टी भी ३ भाद्र २०८२, काठमाडौँः — नेपाल ओलम्पिक कमिटी (एनओसी) विवाद मंगलबार अझ बढी अन्योलपूर्ण र जटिल बनेको छ । एनओसीको तदर्थ कमिटीलाई काम गर्न दिने उद्देश्यले सरकारले सातदोबाटोस्थित एनओसी भवनमा लगाइरहेको ताला खोलिदिएको छ ।
एनओसीकै पूर्वअध्यक्ष ध्रुवबहादुर प्रधानको अध्यक्षतामा पछिल्लो साता तदर्थ कमिटी बनाइएको थियो । तिनै टोलीसहित सरकारी पक्ष सातदोबाटो पुगेको हो । अन्तर्राष्ट्रिय ओलम्पिक कमिटीको मान्यताप्राप्त जीवनराम श्रेष्ठ नेतृत्वको एनओसी हुँदाहुँदै तदर्थ कमिटी बनाइएको थियो ।
सरकारले श्रेष्ठ नेतृत्वको एनओसीलाई अवैधानिक भन्दै आएको छ । पुसमा एनओसीको चुनाव भएयता कार्यालय भवनमा सरकारले ताला लगाएको थियो । यसै विषयलाई लिएर सर्वोच्च अदालतमा मुद्दा विचारधीन पनि छ । तदर्थ कमिटीका प्रवक्ता समिम मियाँ अन्सारीले मिडियासँग भनेका छन्, ‘हामीलाई काम गर्न दिन सरकारले ताला खोलिदिएको हो ।’
जापानमा हुने २० औं एसियाली खेलकुदमा सहभागी हुने खेलाडीको संख्या पठाउने समय एक महिनाभन्दा कम रहेका बेला तदर्थ समितिका पदाधिकारी एनओसी भवनमा प्रवेश गरेका हुन् । यसले एसियाली खेलकुदमा सहभागिताका लागि चाहिने बजेट व्यवस्थापन पनि प्रभावित हुन सक्ने छ ।
खेलकुदमन्त्री तेजुलाल चौधरीले नयाँ ओलम्पिक कमिटी गठन गर्ने घोषणा गरेको केही दिनपछि बनाइएको तदर्थ समितिका लागि ताला खोलिदिनुले सरकारी हस्तक्षेप देखिएको छ ।
