दुई हजार बचतकर्ताको आठ अर्ब रुपैयाँ हिनामिना गरेको आरोपमा प्रहरीले आइडियल यमुना सहकारी संस्थाका अध्यक्ष केबी उप्रेतीलाई पक्राउ गरेको छ । पीडितको उजुरीका आधारमा प्रहरी वृत्त महाराजगन्जबाट खटिएको प्रहरी टोलीले उनलाई बालाजुबाट पक्राउ गरेको हो । 

सहकारी अभियन्तासमेत रहेका उप्रेती एमालेको केन्द्रीय सहकारी विभाग सचिव हुन् । तर, उजुरीपछि पार्टीले उनलाई पदबाट निलम्बन गरेको छ । उनी राष्ट्रिय सहकारी बैंकका अध्यक्षसमेत हुन् । आइडियल यमुनाकै अर्का सञ्चालक कुयाङ लामा भने फरार छन् । 

जिल्ला प्रहरी परिसर काठमाडौंका प्रवक्ता एसपी नवराज अधिकारीले केबी उप्रेती पक्राउ परेको बताए । उनले भने, ‘केबी उप्रेती पक्राउ परेका छन् । उनलाई प्रहरी वृत्त महाराजगन्जले पक्राउ गरेको हो । महाराजगन्जकै हिरासत कक्षमा राखेर अनुसन्धान सुरु गरिएको छ ।’

सरकारले आइडियल यमुना संकटग्रस्त सहकारी रहेको भन्दै छानबिन गर्नुपर्ने सूचीमा राखेको छ । सूर्य थापा संयोजकत्वको सहकारी ठगीसम्बन्धी संसदीय छानबिन समितिले यो सहकारीमाथि छानबिन गरिरहेको छ । 

उप्रेती र कुयाङका दुई सहकारी मर्ज गरेर आइडियल यमुना सहकारी बनेको थियो । यो सहकारीको अध्यक्ष उप्रेती थिए भने कुयाङ सचिव थिए । बचत अपचलन गरेका सञ्चालकहरूले बचतकर्ता रकम लिन जाँदा उल्टै मानसिक ‘टर्चर’ दिन्थे । बचतकर्ताहरूका अनुसार प्रहरीमा उजुरी गरे रकम सधैँका लागि डुब्ने भन्दै त्रास देखाउँथे । 

अर्का सञ्चालक कुयाङ लामाले डुबाइदिए तामाङ घेदुङको १४ करोड 

अर्का सञ्चालक कुयाङ लामाको प्रलोभनमा परेर तामाङ समुदायको साझा संस्था नेपाल तामाङ घेदुङले आइडियल यमुना सहकारीमा नगदसहित १४ करोडबराबरको जायजेथा राखेको थियो । महँगो ब्याज पाउने आसमा सम्पत्ति राखेका घेदुङका पदाधिकारी सहकारीले रकम डुबाइदिएपछि मानसिक तनावमा छन् ।

घेदुङका अध्यक्ष मोहन गोलेले आइडियल यमुनाले घेदुङको १४ करोड रुपैयाँभन्दा धेरै मूल्यबराबरको जायजेथा डुबाएको बताए । ‘आइडियल यमुनाले हाम्रो संस्थाको १४ करोडभन्दा धेरै मूल्यबराबरको जायजेथा डुबाइदियो । सहकारीकै कारण अहिले संस्थाको अस्तित्व नै संकटमा पर्ने अवस्थामा पुग्यो । विश्वभरका तामाङ समुदायले घेदुङका लागि भन्दै रकम जम्मा गरेका थिए । महँगो ब्याज दिने प्रलोभन कुयाङसहितको टोलीले हामीलाई दियो । हामीले रकम सहकारीमा राख्यौँ । अहिले घर न घाटको बनायो,’ उनले भने, ‘हामीलाई खाली चेकमा हस्ताक्षरसमेत गर्न लगाए । त्यसमा आफैँ रकम भरी दुरुपयोग गरेछन् ।’ 

सिभिल सहकारीका सञ्चालकविरुद्ध दोस्रो पूरक अभियोजन : तीन वर्ष हुन लाग्दा पनि सुरु भएन मुद्दाको सुनुवाइ 

सिभिल सहकारी संस्थाको हिनामिनामा दोस्रो पूरक अभियोजन अदालतमा दर्ता भएको छ । १६ जना पीडितको सात करोड ८८ लाख ४४ हजार रुपैयाँ ठगीमा मंगलबार जिल्ला अदालतमा ठगी मुद्दा दर्ता भएको हो । 

सुरुमा एक हजार पाँच सय तीन जाहेरीका आधारमा पाँच अर्ब ६७ करोड रुपैयाँ बिगो कायम गरी ४२ जनाविरुद्ध मुद्दा दायर भएको थियो । पछि ४२ जनाको जाहेरीका आधारमा पहिलो पूरक अभियोजन अदालत पुगेकामा १६ जनाको जाहेरीका आधारमा दोस्रो पूरक अभियोजन दर्ता भएको हो । सो सहकारीका पूर्वअध्यक्ष इच्छाराज तामाङ र अध्यक्ष केशवलाल श्रेष्ठलाई प्रतिवादी बनाएर मुद्दा दायर भएको हो । 

सिआइबीले अनुसन्धान गरी १७ मंसिर ०७८ मा पहिलोपटक मुद्दा दायर गरेको थियो । जसमा मुख्य प्रतिवादी इच्छाराज र केशवलाल अहिले पनि कारागारमै छन् । मुद्दा दायर भएको तीन वर्ष हुन लाग्दा पनि अझै अदालतमा सुनुवाइ सुरु हुनसकेको छैन । ४२ प्रतिवादीमध्ये चारजना अझै उपस्थित भएका छैनन् । 

मुद्दाको सुनुवाइमा ढिलाइ हुँदा पीडितहरू झन् समस्यामा पर्दै गएको जाहेरीकर्तामध्ये एक डिल्ली भट्टराई बताउँछन् । ‘धेरै पीडित ज्येष्ठ नागरिक हुनुहुन्छ,’ उनले भने, ‘१६–१७ जनाले न्यायको लडाइँ लड्दालड्दै ज्यान गुमाइसक्नुभएको छ, अरू अदालतसमेत जान नसक्ने अवस्थामा हुनुहुन्छ । फैसलामा ढिलाइ हुँदा पीडितले आफ्नो पैसा पाउन सकेका छैनौँ ।’ सहकारीको पैसा तामाङले गैरकानुनी रूपमा आफ्ना निजी व्यापारमा लगाएपछि सहकारी डुबेको थियो । यसरी हिनामिना गरिएकोमध्ये केही रकम उनले विदेश लगेकोसमेत आशंका गरिएको छ ।