एस् ए टी भी १३ भाद्र २०८२, काठमाडौँः नेपथ्यले डेनमार्कको कन्सर्टमा पनि दर्शकको राम्रो साथ पाएको छ। युरोपमा औद्योगिक युगको पुरानो वैभव सम्झाउने डेनमार्कको प्रसिद्ध कन्सर्ट थलो पुलेन हलमा कन्सर्ट आयोजना गरिएको थियो । शान्त कोपनहेगन सहर मात्र नभई वरपरका युरोपेली मुलुक फिनल्यान्ड, जर्मनी, नर्वे, स्वीडेन र बेल्जियमदेखि दर्शक नेपथ्यलाई सुन्न कन्सर्टमा उपस्थित थिए ।
नेपथ्यका मुख्य गायक अमृत गुरुङले 'कोशीको पानी' बोलको पहिलो गीत गाउँदै कन्सर्ट सुरु गरेका थिए । डेनमार्कमा नेपथ्यले आफूलाई नौ वर्षपछि मात्रै उभ्याएको हो ।
कन्सर्टमा 'यो जिन्दगानी' गीत प्रस्तुत गरिरहँदा गायक अमृतले स्वदेशमा स्कुल जान नपाएका केटाकेटीलाई सक्दो सहयोग गरिदिएर भए पनि देशप्रतिको दायित्व निभाइदिन दर्शकलाई अपिल गरे ।
अन्तमा 'रातो र चन्द्रसुर्जे' गाउँदै ब्यान्डले दर्शकबाट बिदा माग्यो । कन्सर्टमा अमृतलाई ड्रमसेटमा ध्रुव लामा, बेस गितारमा सुविन शाक्य, गितारमा नीरज गुरुङ, मादलमा शान्ति रायमाझी र किबोर्डमा दिनेशराज रेग्मीले सघाएका थिए ।
डेनमार्कमा हासिल गरेको यो सफलतासँगै १४ सदस्यीय कलाकार, प्राविधिक र व्यवस्थापनको टोली अब अर्को मुलुक माल्टा पुगेको छ । माल्टाको उत्तरी भेगमा पर्ने आटार्ड सहरस्थित 'माल्टा फेयर एन्ड कन्भेन्सन्स सेन्टर हल'मा अगस्त २७ मा नेपथ्य गुञ्जनेछ ।
अगस्त ३१ मा पोर्चुगलको राजधानी लिस्बनस्थित 'लिस्बोआ आओ भिभो'मा प्रस्तुति दिएर युरोप यात्राको अन्तिम प्रस्तुति बेल्जियमको एन्थ्रोपेन सहरमा हुनेछ ।
