नेपाली राष्ट्रिय क्रिकेट टोली एसिसी प्रिमियर कपको उपाधि रक्षा गर्न मंगलबार भारतबाट ओमानतर्फ लागेको छ । नेपालले दोस्रो संस्करणको प्रिमियर कपको तयारीका रूपमा भारतमा रणजी ट्रफी टोली बरोडा र गुजरातसँग प्रतिस्पर्धा गरेको थियो ।

नेपालले उपाधि हात पार्दै प्रिमियर कपको तयारी गरेको छ । नेपाल क्रिकेट संघ (क्यान)ले रोहितकुमार पौडेलको कप्तानीमा १४ सदस्यीय टोली सार्वजनिक गरेको छ ।

यसै टोलीले प्रिमियर कपमा प्रतिस्पर्धा गर्नेछ । नेपालले समूह ‘ए’मा हङकङ, साउदी अरेबिया, कतार र मलेसियाविरुद्ध प्रतिस्पर्धा गर्नेछ । एसियन क्रिकेट काउन्सिल (एसिसी)ले आयोजना गर्ने प्रतियोगितामा हङकङ र मलेसिया नेपालका चिरपरिचित प्रतिद्वन्द्वीका रूपमा रहेका छन् । 

यस समूहमा हङकङ र कतारले नेपाललाई चुनौती दिन सक्छ । गत वर्ष कतारले नेपाललाई पहिलो संस्करणको एसिसी प्रिमियर कपमा नेपाललाई घातक बलिङ गर्दै अलआउट गरेको थियो । तर, ब्याटिङमा चुक्दा नेपालमाथि कतारले जित निकाल्न सकेन ।

यद्यपि, टी–२० खेलमा कतारले नेपाललाई एकपटक स्तब्ध पारेको छ । मलेसियाले टी–२० खेलमा नेपाललाई टक्कर दिए पनि जित निकाल्न सकेको छैन । अहिलेसम्म नेपालले आठै खेलमा नेपालले मलेसियालाई हराएको अवस्था छ । समूह ‘ए’मा नेपालको आइसिसी वरीयतामाथि रहेको छ । पछिल्लो टी–२० वरीयतामा नेपाल १७औँ स्थानमा छ । यद्यपि, नेपालले एक स्थान गुमाएको छ । 

हङकङ : आइसिसी वरीयता २१

एसिसीले आयोजना गर्ने प्रतियोगितामा अक्सर नेपाल र हङकङ एकै समूहमा पर्छन् । यसपटक प्रिमियर कपमा नेपालले समूह ‘ए’ हङकङलाई पुनः एकपटक प्रतिद्वन्द्वीका रूपमा पाएको छ । आइसिसी वरीयतामा हङकङ २१औँ वरीयतामा छ । हङकङ र नेपालबीच नौ टी–२० खेल भएका छन् । जसमा दुवै टोलीले समान चार जित निकालेका छन् । एक खेलको नतिजा निस्किएन । नेपालले घरेलु मैदानमा हङकङलाई दुईपटक हराएको छ । हङकङले आफ्नो घरमा नेपाललाई एकचोटि पाखा लगाएको छ । तटस्थ भूमिमा हङकङ तीन र नेपालले दुई खेलमा जित निकालेको छ । पछिल्लोपटक यी दुई टोलीबीच ९ मार्च २०२४ मा प्रतिस्पर्धा भएको थियो । जसमा हङकङ ७३ रनले विजयी भयो । पहिलो ब्याटिङ गरेको हङकङले ६ विकेट गुमाएर दुई सय १२ रन जोड्यो । प्रत्युत्तरमा नेपाल १६.४ ओभरमा एक सय ३९ रनमा समेटियो । हङकङको ब्याटिङमा बाबर ह्यातले ४९ बलमा १३ छक्का र तीन चौकाको सहयोगमा १ सय १० रनको योगदान दिएका थिए । 

मलेसिया : टी–२० वरीयता २७

अन्तर्राष्ट्रिय क्रिकेटमा नेपाल र मलेसिया एक–आपसका चिरपरिचित प्रतिद्वन्द्वी हुन् । नेपालले एकदिवसीय वरीयता पाउनुअघिसम्म एसोसिएट राष्ट्रमा यी दुईबीच कडा टक्कर हुन्थ्यो । लगातार नेपालले विश्व क्रिकेटमा सफलता चुमिरहँदा मलेसिया पछि परेको छ । तर, एसियनस्तरमा हुने प्रतियोगितामा भने मलेसिया नेपालका लागि राम्रा प्रतिद्वन्द्वीकै रूपमा रहेको छ । ओमानमा १२ अप्रिलबाट हुने प्रिमियर कपमा नेपालले आफ्नो उपाधि रक्षा गर्ने अभियानमा पहिलो खेलमै मलेसियाको सामना गर्दै छ । आइसिसीको टी–२० वरीयतामा नेपालभन्दा मलेसिया आठ स्थानले पछि छ । अन्तर्राष्ट्रिय टी–२० खेलमा नेपाल र मलेसियाबीच आठ खेल भएका छन् । जसमा नेपाल अपराजित रहेको छ । नेपालले मलेसियाविरुद्ध औसत एक सय ७१ रन जोडेको अवस्था छ । ब्याटिङको क्रममा मलेसियाले नेपालविरुद्ध औसत एक सय ५० रन बनाएको छ । 

तथ्यांकअनुसार अहिलेसम्म नेपालले पहिलो ब्याटिङ गर्दै आठवटै खेलमा जित निकालेको छ । नेपालका कुशल मल्लले मलेसियाविरुद्ध समग्रमा १५६ रन बनाएका छन् । मलेसियाका सइद अजिजले अहिलेसम्म नेपालविरुद्ध ९९ रन बटुले । नेपालका पूर्वकप्तान सन्दीप लामिछानेले मलेसियाविरुद्ध सर्वाधिक नौ विकेट लिएका छन् । सोमपाल कामीले ६ र अविनाश बोहराले पाँच विकेट मलेसियाविरुद्ध हात पारेका छन् । मलेसियाका मुहमद अमिरले नेपालविरुद्ध समग्रमा तीन विकेट लिएका छन् । 

कतार : आइसिसी वरीयता २८

नेपालले कतारविरुद्ध अन्तर्राष्ट्रिय टी–२० मा त्यति धेरै खेल खेलेको छैन । यी दुई टोलीबीच पछिल्लोपटक एसिसी प्रिमियर कपको पहिलो संस्करणमै भएको थियो । २७ अप्रिल २०२३ मा कतारले त्रिवि क्रिकेट मैदानमा ५० ओभरको फम्र्याटमा भएको प्रतिस्पर्धामा उत्कृष्ट प्रदर्शन गरेको थियो । पहिलो ब्याटिङ गरेको नेपाल कतारविरुद्ध ४०.३ ओभरमा एक सय ५७ रनमा अलआउट भएको थियो । सहज लक्ष्य पछ्याएको कतार २५.१ ओभरमा ८९ रनमा समेटेको थियो । नेपालले कतारमाथि उत्कृष्ट ६८ रनको जित निकाल्यो । सो खेलमा सन्दीप लामिछानेले ब्याटिङ र बलिङमा अलराउन्ड प्रदर्शन गरेका थिए । उनले ब्याटिङमा ५८ बलमा ४२ रन र बलिङमा १४ रन खर्चेर पाँच विकेट हात पारे । सन् २०१९ मा नेपाल र कतारबीच टी–२० खेल भएको थियो । कतारले आइसिसी पुरुष टी–२० विश्वकपको एसियन क्षेत्रीय प्रतिस्पर्धामा नेपालमाथि चार विकेटको सनसनी जित निकालेको थियो । नेपालले पहिलो ब्याटिङ गरी २० ओभरमा सबै विकेट गुमाएर १२२ रन जोडेको थियो । कतारले १९.२ ओभरमा ६ विकेट गुमाएर जित निकाल्यो । 

साउदी अरेबिया : आइसिसी वरीयता ३१

नेपालले आइसिसी टी–२० वरीयताको ३१औँ स्थानमा रहेको साउदी अरेबियासँग समूह ‘ए’को अन्तिम खेलमा प्रतिस्पर्धा गर्नेछ । अहिलेसम्म नेपाल र साउदी अरेबियाबीच अन्तर्राष्ट्रिय टी–२० खेल भएको छैन । यसकारण नेपालको नयाँ प्रतिद्वन्द्वीका रूपमा साउदी अरेबिया रहेको छ । साउदी अरेबियाले पछिल्ला पाँच खेलमा जित निकालेको छ । नेपालले चारमा जित र एकमा हारको सामना गरेको छ ।