बंगलादेशलाई डिएलएस पद्धतिमा ८ रनले हराउँदै अफगानिस्तान आइसिसी ट्वान्टी २० विश्वकपको सेमिफाइनलमा प्रवेश गरेको छ । वेष्ट इन्डिजको किङ्स टावनमा टस जितेर ब्याटिङ गरेको अफगानिस्तानले निर्धारित २० ओभरमा पाँच विकेट गुमाउँदै एक सय १६ रनको लक्ष्य दिएको थियो । प्रत्युत्तरमा बंगलादेश १७ं.५ ओभरमा अल आउट हुँदा मात्र एक सय पाँच रन बनाउन सक्यो ।
सन् २०१० बाट विश्वकप खेल्दै आएको अफगानिस्तान पहिलो पटक सेमिफाइनलमा पुग्न सफल भयो । यसअघि सुपर आठबाट माथि बढ्न सकेको थिएन । योसँगै सेमिफाइनल समिकरण पूरा भएको छ । फाइनल प्रवेशका लागि भारत र इङ्ल्यान्ड तथा अफगानिस्तान र दक्षिण अफ्रिका भिड्नेछन् ।
बंगलादेशको इनिङ्समा ओपनर लिटन दासले ४९ बलमा पाँच चौका र एक छक्कासहित सर्वाधिक ५४ रन बनाए । अफगानिस्तानका कप्तान तथा स्पिनर रसिद खानले चार ओभरमा सर्वाधिक ४ किवेट लिएका थिए । नविन उल हकले तीन विकेट हात पारे ।
अफगानिस्तानको इनिङ्समा ओपनर रहमानुल्लाह गुर्वाजले ५५ बलमा ३ चौका र एक छक्कासहित सर्वाधिक ४३ रन बनाएका थिए । अर्का ओपनर इब्राहिम जाद्रनले १८ रन जोडे । पहिलो विकेटको लागि दुई खेलाडीबीच ५९ रनको साझेदारी भएको थियो ।
