काठमाडौं । थाइल्याण्डमा दर्जनौँ विद्यार्थी सवार स्कुल बस दुर्घटनामा परेको छ ।
थाइल्याण्डको राजधानी बैंककबाहिर भएको दुर्घटनापश्चात बसमा आगलागी भएको हो । यातायातमन्त्रीकाअनुसार १६ बालबालिका र ३ शिक्षक त्यस बसबाट निस्कन सफल भएको तर, २२ विद्यार्थी र ३ शिक्षकको अवस्था भने अज्ञात रहेको छ।
सो बस बैंकक राजमार्गमा जाँदै गर्दा टायर पड्किएसँगै बस दुर्घटना भएको एक उद्धर टोलीका सदस्यले बताए ।
बस कम्प्रेस्ड न्याचुरल ग्यास (सीएनजी) बाट चल्ने मन्त्री सुरियाहे जुआंगरुंआगंकिटले बताए । जोखिमपूर्ण भएकाले सार्वजनिक यातायातमा यस्तो इन्धनको प्रयोगमा रोक लगाउनुपर्ने उनले बताए ।
सरकारले सम्पूर्ण स्वास्थ्य खर्च र मृतकको क्षतिपूर्ति व्यहोर्ने उनले जानकारी गराए । बसमा भने १० शव भेटिएको बीबीसी थाई सर्भिसले जनाएको छ । आगलागीले बसमा पूर्ण रुपमा क्षति भएको छ ।
अत्याधिक तापका कारण अन्वेषकहरु बसमा प्रवेश गर्न नसकेको स्थानीय मिडियाले जनाएको छ । उत्तरी प्रान्त उथाई थानीबाट शैक्षिक भ्रमणबाट फर्किरहेको ३ बसमध्ये एकमा आगलागी भएको हो ।
बसमा सवार सम्पूर्ण बालबालिकाको उमेर खुलिसकेको छैन । यद्यपि, सो विद्यालयमा अध्ययनरत सबै विद्यार्थीको उमेर ३ देखि १५ वर्षको बीच रहेको छ ।
