काठमाडौँ — २० जनवरीदेखि जापानमा भएको भारी हिमपातका कारण देशभरमा ३५ जनाको मृत्यु हुनुको साथै ३५८ जना घाइते भएका अग्नि तथा प्रकोप व्यवस्थापन निकायले जानकारी दिएको छ ।
निगाता, अकिता, यामागाता, होक्काइदो र आओमोरीलगायतका प्रान्तमा हताहती भएको जापानी सञ्चारमाध्यमले सरकारी अधिकारीलाई उद्धृत गर्दै रिपोर्ट गरेका छन् ।
जापानको समुद्री तटमा रहेको निगाता प्रान्तमा मात्रै बुधबारसम्म १२ जनाको मृत्यु भएको छ । अग्नि अधिकारीहरूका अनुसार धेरैको मृत्यु हिउँ हटाउने क्रममा भएकाे हाे । चिसोका कारण अचानक बिरामी पर्ने र अस्पताल भर्ना हुने क्रम जारी छ।
जापानको मौसम विज्ञान निकायका अनुसार हिउँदे चिसोको चापको निरन्तरताका कारण मुख्यतया: उत्तरी र पश्चिमी जापानको समुद्रमा भारी हिमपात भएको छ।
सार्वजनिक प्रसारक एनएचकेले जनाएअनुसार आओमोरी प्रान्तका केही भागमा हिउँ ४.३ मिटरभन्दा बढी जमेको छ भने निगाताका केही क्षेत्रमा करिब तीन मिटर हिउँ जमेको छ । क्योदो न्यूजका अनुसार खराब मौसमले १४ आवासीय भवनहरूमा क्षति पुर्याएको छ।
जापानका अधिकांश क्षेत्रमा तापक्रम बढेसँगै अधिकारीहरूले बासिन्दाहरूलाई हिमपहिरो, छतबाट खस्ने हिउँ र यातायात अवरोधबाट सतर्क रहन चेतावनी दिइरहेका छन्।
