वासिङ्टन, पुस २४ गते । पहिले बेला-१ भनेर चिनिने एउटा खाली तेल ट्याङ्कर अमेरिका र रुसबिचको पछिल्लो तनावको केन्द्र बनेको छ । वाल स्ट्रिट जर्नलको बुधबारको रिपोर्टअनुसार संयुक्त राज्य अमेरिकाले पछ्याइरहेको उक्त ट्याङ्करलाई सुरक्षित रूपमा फिर्ता ल्याउन रुसले पनडुब्बीसहितका नौसैनिक साधन परिचालन गरेको छ ।
रिपोर्टअनुसार बेला-१ ले १५ दिनभन्दा बढी समयदेखि भेनेजुएलाको नजिक अमेरिकी नाकाबन्दीबाट जोगिन प्रयास गरिरहेको थियो । प्रतिबन्धित तेल बोकेका ट्याङ्करलाई लक्षित अमेरिकी कारबाहीका कारण जहाजले भेनेजुएलामा डक गरी तेल लोड गर्न सकेन । जहाज खाली अवस्थामा भए पनि अमेरिकी तटरक्षकले यसलाई एट्लान्टिक महासागरमा पछ्याइरहेको बताइएको छ ।
वाल स्ट्रिट जर्नलका अनुसार अमेरिका रुसद्वारा बेचिएको कालो बजार तेलसहित विश्वभर अवैध रूपमा तेल ढुवानी गरिरहेका ट्याङ्करको फ्लीटविरुद्ध कारबाही तीव्र पारिरहेको छ । यही सन्दर्भमा बेला-१ पनि अमेरिकी निगरानीमा परेको हो । गत डिसेम्बरमा बेला-१ ट्याङ्करलाई नियन्त्रणमा लिन अमेरिकी कानून कार्यान्वयन निकायले प्रयास गर्दा जहाजमा तनावपूर्ण अवस्था सिर्जना भएको थियो ।
अमेरिकी अधिकारी जहाजमा चढेर निरीक्षण तथा नियन्त्रण लिन खोजिरहेका बेला चालक दलका केही सदस्यले त्यसको प्रत्यक्ष प्रतिरोध गरे । स्थिति यति बिग्रियो कि दुवै पक्षबिच धकेलाधकेल र मुक्कामुक्कीसम्मको अवस्था उत्पन्न भयो, जसले समुद्रमै सुरक्षा जोखिम बढाएको थियो । रुसले आफ्ना तेल बोक्ने ट्याङ्कर अमेरिकाले जफत गरिरहेको विषयलाई गम्भीर चासोका साथ हेरिरहेको छ ।
रुसी राज्य समाचार एजेन्सी आरआइएका अनुसार मङ्गलबार रुसी विदेश मन्त्रालयले ट्याङ्कर वरपरको अवस्थालाई ‘चिन्ताका साथ’ निगरानी गरिरहेको जनाएको छ । यसबिच अमेरिकी सेनाको दक्षिणी कमान्डले पनि सक्रिय तयारीमा रहेको सन्देश दिएको छ । दक्षिणी कमान्डले सामाजिक सञ्जाल एक्समा पोस्ट गर्दै भनेको छ, “सधैँ सेवा गर्न तयारः दक्षिणी कमान्ड यस क्षेत्र हुँदै पारगमन गर्ने स्वीकृत जहाज र सम्बन्धित गतिविधि विरुद्ध खडा हुन अमेरिकी सरकारी एजेन्सी साझेदारलाई समर्थन गर्न तयार छ । हाम्रा समुद्री सेवा सतर्क, फुर्तिला र रुचिका जहाज ट्र्याक गर्न तैनाथ छन् । आवश्यकता परेमा हामी तुरुन्तै उपस्थित हुने छौँ ।”
अमेरिकी तटरक्षकले बेला-१ लाई पछ्याउने कार्य जारी राखेको छ । एआइएस पोजिसनिङका आधारमा जहाज हाल आइसल्यान्डबाट करिब ३०० माइल दक्षिणमा, उत्तरी समुद्रतर्फ यात्रा गरिरहेको बताइएको छ । यस घटना क्रमले विश्वव्यापी तेल कारोबार र समुद्री सुरक्षा सम्बन्धी विषयमा अमेरिका-रुसबिचको प्रतिस्पर्धा र तनाव अझ तीव्र बनाएको विश्लेषक बताउँछन् । रासस/एएनआई
