पेन्सिलभेनिया । संयुक्त राज्य अमेरिकाको पेन्सिलभेनिया राज्यमा ‘घरेलु मामिला’ सम्बन्धी अनुसन्धान गरिरहेका तीन प्रहरी अधिकारीको गोली लागेर मृत्यु भएको छ भने अन्य दुई जना गम्भीर घाइते भएका छन्।
अधिकारीहरूका अनुसार प्रहरीको जवाफी कारबाहीमा बन्दुकधारीको पनि मृत्यु भएको छ। पेन्सिलभेनिया राज्य प्रहरी आयुक्त क्रिस्टोफर पेरिसले बन्दुकधारीलाई प्रहरीले गोली हानेर मारेको बताएका हुन्।
यो घटना स्थानीय समयअनुसार दिउँसो २ बजेपछि भएको हो। घटनास्थलका तस्बिरहरूमा एक प्रहरी अधिकारीलाई मेडिकल हेलिकप्टरबाट एयरलिफ्ट गरिएको देखाइएको छ।
गोलीकाण्डपछि नजिकैको स्प्रिङ ग्रोभ, पेन्सिलभेनियाको एक विद्यालयलाई छोटो समयका लागि सुरक्षित स्थानमा बस्न भनिएको थियो। करिब २ हजार ५०० जनसंख्या भएको यो सानो सहरको विद्यालयमा घटनाले कुनै असर नपारेको पछि जानकारी दिइएको छ। अधिकारीहरूले सर्वसाधारणका लागि कुनै खतरा नरहेको बताएका छन्।
यो गोलीकाण्ड फिलाडेल्फियाबाट करिब १६० किलोमिटर पूर्वमा रहेको नर्थ कोडोरस टाउनशिप, योर्क काउन्टीको ग्रामीण इलाकामा भएको हो । अधिकारीहरूले प्रहरी अधिकारीहरू अघिल्लो दिनदेखि सुरु भएको अनुसन्धानका लागि घटनास्थलमा खटिएको बताएका छन्।
आयुक्त पेरिसले अनुसन्धान जारी रहेकाले प्रहरीले धेरै विवरण सार्वजनिक नगरेको बताएका छन्। पेन्सिलभेनियाका गभर्नर जोश शापिरो बुधबार दिउँसो घटनास्थल पुगेका थिए र मारिएका प्रहरी अधिकारीका परिवारसँग भेट गरेको स्थानीय सञ्चारमाध्यमले जनाएका छन्।
शापिरोले पछि मारिएका तीन अधिकारीको सम्मानमा राज्यका सबै झण्डालाई आधा झुकाउन आदेश दिएका छन्। एफबीआईका निर्देशक काश पटेलले एजेन्टहरू स्थानीय र राज्यका साझेदारहरूलाई सहयोग गर्न घटनास्थलमा खटिएको बताएका छन्।
