एस् ए टी भी १३ भाद्र २०८२, काठमाडौँः युक्रेनको राजधानी किभको केन्द्रमा बिहीबार बिहान रुसले गरेको ठूलो हवाई हमलामा कम्तीमा १७ जनाको मृत्यु भएको छ भने ४८ जना घाइते भएका छन् ।
उक्त हमलामा परी युरोपेली संघको कूटनीतिक कार्यालयसमेत क्षतिग्रस्त भएको छ । युक्रेनका अधिकारीका अनुसार तीन वर्षदेखि चलिरहेको युद्धमा रुसले किभमाथि गरेको यो पहिलो ठूलो हमला हो । उक्त हमलामा ५ सय ९८ ड्रोन र ३१ वटा विभिन्न प्रकारका मिसाइलहरू प्रयोग भएको युक्रेनको वायुसेनाले जनाएको छ ।
रुसको रक्षा मन्त्रालयले उक्त हमला युक्रेनको सैन्य हवाई अड्डा र सैन्य औद्योगिक क्षेत्रलाई लक्षित गर्दै भएको दाबी गरेको छ । क्रेमलिनले बिहीबारको हवाई हमलाको बाबजुद पनि शान्ति वार्ता जारी राख्न चासो राखेको बताएको छ । युक्रेनले रुसी हमलाले सर्वसाधारणलाई निसाना बनाएको र धेरै गैरसैनिकको ज्यान गएको बताएको छ । किभका १० वटै जिल्लाका ३३ स्थानमा प्रत्यक्ष हमलाका कारण क्षति पुगेको जनाइएको छ । हमलामा परी २ देखि १७ वर्ष उमेर समूहका ४ जना बालबालिकाको मृत्यु भएको किभ सहर प्रशासनका प्रमुख टिमुर तकाचेन्कोले बताए ।
मृतक र घाइतेको संख्या अझै बढ्न सक्ने अनुमान गरिएको छ । हमलामा सहरको एक सपिङ मलसहित करिब १ सय भवनहरूमा क्षति पुगेको छ । स्थानीय ओलेक्जेन्डर खिल्कोले आफ्नी बहिनी बस्ने भवनमा मिसाइल हमला भएको र तीन जनालाई उद्धार गरेको बताए । ‘सर्वसाधारणमाथि आक्रमण गर्नु निकै अमानवीय छ, यो युद्ध चाँडै अन्त्य होस् भन्ने मेरो चाहना छ,’ उनले भने ।
युक्रेनी राष्ट्रपति भोलोदिमिर जेलेन्स्कीले रुसले वार्ताको सट्टा आक्रमण जारी राखेको भन्दै आलोचना गरिरहेका छन् । ‘रुसले वार्ताको टेबलको सट्टा ब्यालिस्टिक रोजेको छ,’ जेलेन्स्कीले किभ हमलापछि ‘एक्स’ मा लेखेका छन्, ‘जसले शान्तिका लागि निरन्तर आह्वान गर्दै आएका छन्, हामी उनीहरूबाट यो हमलाका बारेमा प्रतिक्रियाको अपेक्षा गर्छौं । तर सबै सिद्धान्ततः अडान लिनुको सट्टा प्रायः मौन बस्छन् ।’ जेलेन्स्कीले युक्रेन बिनासर्त पनि शान्ति सम्झौताका लागि तयार रहेको उल्लेख गर्दै रुसलाई पनि वार्ताको टेबलमा आउन बाध्य पार्ने गरी उसको अर्थतन्त्रलाई कमजोर पार्ने गरी अमेरिकाले उसमाथि कडा प्रतिबन्धहरू लगाउन माग गरेका छन् ।
युरोपेली संघ र बेलायतको प्रतिक्रिया
युरोपेली आयोगकी अध्यक्ष उर्सुला भोन डर लेयनले युरोपेली संघको युक्रेन मिसन भवनबाट ५० मिटरको दूरीमा २० सेकेन्डको फरकमा दुई वटा हमला भएको बताइन् । उर्सुलाले हमलाबाट आफ्ना कर्मचारी सकुशल रहेको पनि बताइन् । युरोपेली संघका शीर्ष कूटनीतिज्ञ काजा कालासले बिहीबार ‘एक्स’ मा एक पोस्ट गर्दै भनेकी छन्, ‘कूटनीतिक नियोग कहिल्यै पनि हमलाको निसाना बनाइनु हुँदैन । हामी ब्रसेल्समा रुसी राजदूतलाई बोलाउँदै छौं ।’
बेलायतको सांस्कृतिक सम्बन्ध तथा शैक्षिक अवसर प्रवर्द्धन गर्ने संस्था ब्रिटिस काउन्सिलले पनि हमलामा परी किभस्थित आफ्नो कार्यालयमा क्षति पुगेको र अर्को सूचना नआएसम्म आगन्तुकहरूका लागि कार्यालय बन्द गरिएको बताएको छ । काउन्सिलले कार्यालय भवनका झ्याल र प्रवेशद्वारमा क्षति पुगेको र हमलामा परी एक सुरक्षा गार्ड घाइते भएको जनाएको छ ।
बेलायती प्रधानमन्त्री केयर स्टार्मरले रुसी राष्ट्रपति भ्लादिमिर पुटिनले ‘अर्थहीन’ हमलाहरू गरेर शान्तिको आशालाई ‘ध्वस्त’ पारेको आरोप लगाए । अमेरिकी राष्ट्रपति डोनाल्ड ट्रम्पको अग्रसरतामा भइरहेको शान्ति प्रयासले गति लिन नसकिरहेका बेला रुसले भने युक्रेनमाथि ड्रोन तथा क्षेप्यास्त्रको बमबारीलाई निरन्तरता दिइरहेको छ ।
युक्रेन र रुसबीच शान्ति वार्ताको प्रयास भइरहेका बेला युक्रेनको राजधानीमा नै ठूलो हमला भएपछि विश्वस्तरका नेताहरूले चिन्ता व्यक्त गरेका हुन् । अमेरिकी राष्ट्रपति डोनाल्ड ट्रम्पले पुटिनसँग हालै भेट गरेर युद्ध अन्त्यको छलफल गरेका थिए । पछिल्लो हमलाले युक्रेन–रुस युद्धको जटिलतालाई बढाएको छ भने शान्ति वार्तालाई थप पेचिलो बनाएको बताइएको छ ।
