एस् ए टी भी ४ भाद्र २०८२, काठमाडौँः गाजामा जारी युद्ध विरामको चरणमा प्रवेश गरेको छ । मध्यस्थकर्ताले राखेको नयाँ प्रस्तावमा हमासले सहमति जनाएसँगै युद्धविराम हुने अपेक्षा राखिएको छ । अन्तर्राष्ट्रिय सञ्चारमाध्यमका अनुसार प्यालेस्टिनी सशस्त्र समूह हमासले युद्धविराम सम्झौताको प्रस्ताव स्वीकृत गरेको हो ।
कतारले पनि युद्ध अन्त्यका लागि बृहत् सम्झौतामा पुग्ने लक्ष्यसहितको सकारात्मक प्रतिक्रिया प्राप्त भएको पुष्टि गरेको छ। यद्यपि, इजरायलले यस विषयमा अहिलेसम्म कुनै आधिकारिक प्रतिक्रिया भने दिएका छैनन् । यस कारण मध्यस्थकर्ताहरुको पर्खाइ अब इजरायलको प्रतिक्रिया के हुने हो भन्नेमै छ ।
बीबीसीका अनुसार गत जुनमा अमेरिकी दूत स्टिभ विटकफले दिएको प्रस्तावको रूपरेखामा आधारित रहेर इजिप्ट र कतारले हमासलाई यो प्रस्ताव गरेको थियो । प्रस्ताव अनुसार पहिलो ६० दिनको युद्धविराम लागू हुनेछ । यसपछि हमाससँग रहेका ५० इजरायली बन्धकलाई दुई समूहमा रिहा गरिनेछ । त्यसपछि थप युद्धविरामको कुराकानी अगाडि बढाइनेछ ।
गत साता इजारायलका प्रधानमन्त्री बेन्जामिन नेतान्याहुले सबै बन्धकलाई रिहा गरेपछि मात्र आफूहरू कुनै सम्झौताका लागि तयार हुने बताएका थिए । तर हमासले प्रस्तावमाथि समर्थन जनाउँदा हालसम्म इजरायलले कुनै आधिकारीका धारणा राखेको छैन । बरु इजरायलले हमासमाथि आक्रमण गरिरहेको छ ।
प्यालेस्टिनी स्वास्थ्य मन्त्रालयका अनुसार पछिल्लो २४ घन्टामा कम्तीमा ६० जनाको मृत्यु भएको छ भने ३४३ जना घाइते भएका छन् । जसमध्ये ३१ जनाले समयमै उपचार नपाएका कारण ज्यान गुमाउनुपरेको अलजजिराले जनाएको छ ।
यता खान युनिसमा विस्थापित भएर अस्थायी पालमा बसेकाहरूमाथि पनि इजरायली आक्रमण भएको छ । जसमा आठ जनाको मृत्यु भएको अलजजिराले लेखेको छ । देर अल-बालाहमा भएको यस्तै अर्को आक्रमणमा थप चार जना मारिएका छन् ।
फर्किएलान् विपिन ?
अक्टोबर ७ को हमलामा १० जना नेपालीको हत्या भएको थियो । हमास समूहले इजरायलको अलमिम कबुजमा आक्रमण गर्दा १० नेपाली मारिएका थिए । आक्रमणकै क्रममा कञ्चनपुरका विपिन जोशीलाई बन्धक बनाएको थियो ।
उनी बन्धक भएको आज २ वर्ष पुग्नै लागेको छ तर उनी अझै रिहा भएका छैनन् । गत साउन २६ गते विपिनका आमा पद्मा र बहिनी पुष्पा इजरायलमा गएका छन् । उनीहरूले त्यहाँको राष्ट्रपति र संसद्का अध्यक्षलाई भेट गरेर विपिनको रिहाइको माग गरेका छन् । यदि इजिप्ट र कतारको प्रस्तावलाई हमासले जस्तैगरी इजरायलले पनि स्वीकार गर्यो भने विपिन फर्किने सम्भावना देखिन्छ ।
गत अक्टोबर २०२३ देखि गाजामा जारी युद्धका कारण हालसम्म ६३ हजार भन्दा बढी मारिएका छन् । जसमध्ये ६१ हजार ८ सयभन्दा बढी प्यालेस्टिनी नागरिक छन् भने १९ सयभन्दा बढी इजरायली छन् । त्यस्तै १ लाख ५६ हजारभन्दा बढी मानिस घाइते भएको अलजजिराले लेखेको छ ।
