एस् ए टी भी २८ जेठ, काठमाडौंः अमेरिका र चीनले दुई दिनको लन्डन वार्ता सम्पन्न गरेपछि व्यापार तनाव कम गर्न र विश्वव्यापी उत्पादनमा असर पर्ने निर्यात नियन्त्रणहरू हटाउने विषयमा कार्यान्वयन ढाँचामा सहमति गरेका छन्।
दुवै पक्षका अधिकारीहरूले बुधवार भनेअनुसार, जेनेभामा गएको महिनाको वार्तामा र पछिल्लो हप्ता दुवै देशका राष्ट्राध्यक्षबिचको टेलिफोन वार्तामा बनेको सहमतिलाई कार्यान्वयन गर्ने ‘सिद्धान्तगत रूपमै सहमति’ भएको चीनका व्यापार वार्ताकार ली छेङगाङले लन्डनमा पत्रकारहरूलाई बताएका छन्।
अमेरिकी वाणिज्य सचिव हावर्ड लुटनिकले भने, प्रस्तावलाई अहिले दुवै पक्षका नेताहरूसमक्ष स्वीकृति लिन पठाइनेछ। ‘यदि यो स्वीकृत भयो भने, हामी कार्यान्वयन सुरु गर्नेछौँ’ ।
यद्यपि दुवै पक्षले सम्झौताको विवरण सार्वजनिक गरेका छैनन्, लुटनिकले सङ्केत गरेअनुसार, दुवैले एकअर्काका लागि महत्त्वपूर्ण वस्तु र प्रविधिमा लागेका निर्यात नियन्त्रण फिर्ता लिन सहमति जनाएका छन्।
रिपोर्ट अनुसार, चीनले अमेरिका तर्फ दुर्लभ खनिज र चुम्ब को निर्यातमा लगाएको प्रतिबन्ध पनि यस कार्यान्वयन ढाँचाको ‘मूलभूत भाग’ को रूपमा समाधान गरिनेछ।
लुटनिकले थपे, ‘जब ती दुर्लभ खनिजहरू अमेरिका आउन रोकिएको थियो, त्यति बेला अमेरिका सरकारले पनि केही प्रतिबन्धहरू लगाएको थियो। तपाईँले ती पनि हटाइने अपेक्षा गर्न सक्नुहुन्छ – ट्रम्पले भनेजस्तै: ‘सन्तुलित तरिकाले।’
