काठमाडौँ, चैत २६ गते । काभ्रेली साहित्यकार सूर्यप्रसाद लाकोजूको कथासङ्ग्रह सत्याग्रह प्रकाशन भएको छ । यो कथासङ्ग्रह ट्रान्सवल्ड पब्लिकेशनले प्रकाशन गरेको हो ।
यस कथासङ्ग्रहभित्र जम्मा एघार ओटा कथा छन् । प्राय कथाहरू हुँदा खाने भुइँमान्छेहरूको पीडा, अभाव, उनीहरूको सङ्घर्ष आदिलाई विषयवस्तु बनाएर लेखिएका छन् । जीवन सङ्घर्षमय छ । त्यसैले हरेक परिस्थितिसँग मुकाबिला गरेर जीवन जिउनुपर्ने सन्देश कथाहरूले बोकेको कथाकार लाकोजूले दाबी गर्नुभयो ।
कथाहरूमा माया, प्रेमका सन्दर्भ पनि छन् । सामाजिक सञ्जालको दुरुपयोगका कारण जीवन बर्बाद भएको प्रसङ्ग पनि कथामा छन् । राजनैतिक आस्था र विश्वासका कारण क्रान्तिमा होमिएका सपूतका योगदानको चर्चा पनि कथाहरूमा गरिएको छ । साहित्यकार लाकोजूका कविता, निबन्ध, हाइकु, नियात्रा, मुक्तक , अनुवाद गरी तीन दर्जन साहित्यिक कृतिहरू प्रकाशित छन् । कविता विधाका सशक्त कवि लाकोजूको यो कथासङ्ग्रह भने पहिलो कृति हो ।
