चितवन, असोज ११ गते । नारायणी नदीमा आइतबार यस वर्षकै सबैभन्दा उच्च जलसतह मापन गरिएको छ । आइतबार बिहान ७ बजे नदीको जलसतह उच्च अवस्थामा पुगेको हो ।
पछिल्ला केही वर्षयता असोज महिनामा नारायणी नदीमा जलसतह बढ्ने गरेको देखिन्छ । दुई वर्षअघि, २०८१ असोज १२ गते नदीको सतह यस वर्षको तुलनामा अझ माथि पुगेको थियो । स्थानीय बासिन्दाका अनुसार उक्त समय आएको बाढी उनीहरूले देखेको सबैभन्दा ठूलो बाढीमध्ये एक थियो ।
यस वर्ष पनि सोही समय आसपास उस्तै प्रकृतिको बाढी आएको स्थानीयको भनाइ छ । पहाडी क्षेत्रमा निरन्तर वर्षा भइरहेकाले नारायणी नदीमा पानीको बहाव अझ बढ्न सक्ने स्थानीय बासिन्दाले अनुमान गरेका छन् ।
जल तथा मौसम विज्ञान विभागको प्रक्षेपणअनुसार असोज १२ गतेसम्म वर्षा जारी रहनेछ । वर्षा निरन्तर भइरहेमा नदीको जलसतह थप बढ्न सक्ने जोखिम रहेको छ ।
बाढी पूर्वानुमान महाशाखाले आइतबार राति १ः५० बजे जारी गरेको बुलेटिनमा नदीमा बाढी बढिरहेको जनाउँदै आसपासका बासिन्दालाई सतर्क रहन अनुरोध गरेको थियो ।
नदीको जलसतह बढेसँगै नारायणी आसपासका तटीय क्षेत्रका बासिन्दालाई मौसम तथा बाढीसम्बन्धी आधिकारिक सूचना निरन्तर हेर्न र आवश्यक सावधानी अपनाउन आग्रह गरिएको छ ।
