डाक्टरलाई सोधे मैले दिल दुखेको दवाई
डाक्टरले भन्छन् दिलमा पीर गडेको छ भाई
पाइएन ओखती दिल दुखेको,
त्यसैले हो, मेरो ज्यान सुकेको
पछिल्लो समय युवा पुस्ताको प्रिय गीत हो यो । सामाजिक सञ्जाल टिकटकमा पनि यो गीतमा थुप्रै भिडियो बनेका छन् । विवाह, पार्टी, पिकनिकमा समेत गीत प्राथमिकतामा परेको छ । रोमान्टिक लोकशैलीको यो दोहोरी शैलीमा तयार यस गीतकी गायिका हुन् सुजाता केसी । उनलाई हरि गिरी ‘विर्मसी’ले गायनमा साथ दिएका छन् ।
गायिका केसीका अनुसार करिब २ महिना अगाडि आएको यो गीत सार्वजनिक भएकै बेला युट्युवको ट्रेन्डिङमा समेत परेको थियो । उनले यो गीत आफ्नै आधिकारिक युट्युव च्यानल ‘सुजाता केसी’ बाट ल्याएकी छन् । नयाँ च्यानलबाट पनि गीतले दुई करोड भ्यूज पाउनुलाई यसको लोकप्रियता अड्कल गर्न सकिन्छ ।
गीतको भिडियोमा काजिश श्रेष्ठ, लोमस शर्मा, करिष्मा ढकाल र आभा थापाको अभिनय छ । ‘गीतको टिकटक मात्र ८० हजार बढी बनेको छ’ उनले थपिन् । गीतले भनेझै के गायिका केसीले पाइन् त ओखती दिल दुखेको ? ‘गायकको लागि सबैभन्दा ठूलो ओखती दर्शक, श्रोताको माया हो । त्यो यही गीतबाट मैले पाएँ,’ उनले भनिन् ।
दशकदेखि गायनमा
सुजाता २०६६ सालदेखि गायनमा आएकी हुन् । उनले पहिलो गीतको रुपमा तीज गीत ‘छमछम पाउजु’ ल्याएकी थिइन् । त्यसपछि ‘आज कोही किन मलाई मन परेको छ’ बोलको आधुनिक गीत ल्याइन् । ठाकुरप्रसाद दुलालको शब्द, संगीत रहेको यो गीत उनको ‘काकाकुल’ एल्बममा समावेश छ ।
‘अहिले फाट्टफुट्ट गीत गर्ने चलन छ,’ उनी विगतमा फर्किइन्, ‘त्यो समय एल्बम निकाल्ने चलन थियो । त्यही भएर एल्बम ल्याएँ ।’ ७ वटा गीत समेटिएको पहिलो एल्बमका सबै गीत हिट नभएपनि उनी सन्टुष्ट थिइन् । सानैदेखि गायनमा रुचि भएकी उनी स्कुल, कलेजका सांगीतिक कार्यक्रम गाउँदै आफूलाई निखार्दै आइन् । उनी हरेक वर्षको तीजमा अनिवार्य तीज गीत ल्याउँछिन् ।
‘तीज हाम्रो संस्कृति हो । त्यसको संरक्षणका लागि वर्षमा एउटा गीत अनिवार्य ल्याउँछु,’ उनले अगाडि भनिन्, ‘वर्षमा अन्य गीत ३/४ वटा पनि आउँछ ।’ ‘पाइएन ओखती दिल दुखेको’ उनको धेरै चर्चित गीत भएपनि युट्युवको करोड क्लबमा पुग्न सफल पहिलो गीत भने ‘बाजा बजाउँदै’ बोलको थियो । पहिलो लकडाउनको एक दिन अगाडि सार्वजनिक यो गीतमा संगीतकार अर्जुन पोखरेलको संगीत र लोकराज अधिकारीको शब्दछ ।
गायनमा उनले संगीतकार पोखरेलसँग पहिले पनि सहकार्य गरेकी थिइन् । युट्युवमा करोड क्लबमा पुग्न सफल आफ्नो पहिलो गीत भएकोले उनले यसको खुसीमा केक काट्दै धुमधामसँग साथीभाईमाझ सेलिब्रेसन गरेकी थिइन् ।
‘बाजा बजाउँदै’पछि अहिलेसम्म उनले थुप्रै गीत सार्वजनिक गरिसकेकी छन् । ‘जाल बुन्यो’, ‘कुरा सिधा छ’, ‘बतास बनी छुन आई देउ न’ लगायत गीत दशक–श्रोताले अत्याधिक रुचाएको उनी बताउँछिन् ।
गायनको सुरुवात
उनी सानैदेखि स्कुल कलेजका कार्यक्रममा भाग लिन्थिन् । त्यो क्रममा सबैले स्वर राम्रो छ, गायिका बन्नुपर्छ भनेर हौस्याउँथे । त्यो समय न उनले गायन बुझेकी थिइन्, न गीत । तैपनि गीत गाउन रमाइलो लाग्थ्यो उनलाई । यसरी शौखको रुपमा गाउँदै अगाडि बढिन् । भविष्यमा यस्तो बन्छु भन्ने दिमागमा आउनु पहिले नै आफूले गायन सुरु गरिसकेको उनले सुनाइन् ।
केसी ललितपुरको विकट गाउँ टुठादुर्लुङमा जन्मिएकी हुन् । उनी पढ्ने स्कुलका प्रिन्सिपल रहेका बुबाले पनि गायनमा लाग्न प्रेरणा दिन्थे । स्कुलमा हुने अतिरिक्त क्रियाकलापमा निरन्तर भाग लिदै गएपछि उनको सानैदेखि प्रतिभा निखारिदै आयो ।
‘मेरो स्कुलमा त्यो समय म्युजिक सिस्टमको सुविधा थिएन,’ उनी स्कुले जीवनमा फर्किइन्, ‘त्यो समय बुबाले आफैले गीत लेखी कम्पोजसमेत गर्नुहुन्थ्यो । हामी बिना म्युजिकै गाउँथ्यौ ।’ त्यसरी गीत गाउँदा उनलाई ठुलो भएर संगीत सहितको गीत गाउने रहर जाग्यो । भनिन्, ‘त्यही समय मैले ठूलो भएर गायिका बन्छु भन्ने अठोट लिएँ ।’
गायनबाट आत्मसन्तुष्टि
एक दशक बढी समय बितिसक्यो उनले गायन क्षेत्र अंगालेको । गायन उनलाई यसकारण फापेको छ कि यसैबाट नाम र दाम दुबै कमाइरहेकी छन् । ‘घरमा आफ्ना लागि पकेट खर्च माग्नुपर्दैन । सबै पुगेको छ । त्यसमै सन्तुष्टी छ,’ उनी खुसी देखिइन् । त्यसो त गायनबाट अधिक कमाउने चाहना पनि छैन उनमा । आफ्नो युट्युव च्यानल, अडियो र टिकटकबाट पनि आम्दानी हुने गरेको उनी सुनाउँछिन् । राम्रो कन्टेन्ट दिन सकियो भने अहिले गायक गायिकालाई बाँच्न गाह्रो नभएको उनको जिकिर छ ।
हिट भयो भने राम्रो आम्दानी हुन्छ । तर नयाँलाई गाह्रै छ । ‘गायक गायिकाको धेरै गीत चल्नु पर्दैन । एउटै गीत चलेपनि पुग्छ’, उनले अगाडि भनिन् ‘जब गीत चल्छ, तब स्टेज कार्यक्रमले भ्याइ नभ्याइ हुन्छ । आम्दिानी पनि त्यहीअनुसार बढ्ने नै भयो ।’
केही अगाडिसम्म उनलाई पनि स्टेज कार्यक्रमले भ्याइ नभ्याइ थियो । अहिले भने उनलाई कामको चाप छैन । ‘ब्यस्तताको समयमन विवाह गरें, सन्तान जन्माएँ । केही समयको अन्तरालपछि गायनमा फर्किएकोले अहिलेस्टेज कार्यक्रम थोरै गरिरहेकी छु’, उनले कारण खोलिन्, ‘ग्याप भएपछि फर्किदा फेरि करियर सुरुदेखि अगाडि बढाउनु पर्दाे रहेछ ।’
गायनसँगै अभिनय पनि
पछिल्लो समय गायक/गायिकामा आफ्नो म्युजिक भिडियोमा आफै अभिनय गर्ने चलन बढ्दो छ । उनले पनि पहिले आफ्नो गीतको भिडियोमा आफै अभिनय गर्दै आएकी थिइन् । तर पछिल्लो समय भने अरुलाई चान्स दिएकी छिन् । ‘बच्चा भएपछि महिलाको शरीर बिग्रदो रहेछ’, उनले सुनाइन् ‘शरीर राम्रो नभएपछि पहिले जस्तो अभिनयमा कम्फर्टेवल फिल पनि नहुँदो रहेछ ।’
पहिले झै आफ्नो शरीर मेन्टन गर्ने कोसिसमा लागेकी उनको अगामी दिनमा भिडियो अभिनय गर्ने सोच भने यथावत छ । भन्छिन्, ‘अरुको भिडियो पाउँछु पाउँदिन थाहा छैन, आफ्नो गीतमा भने अभिनय गर्छु ।’ विशेष गरी लोकपप गायन रुचाउने बजारमा आएका उनको गीत यही शैलीका बढी छन् । जुन गीत दर्शकले रुचाएको पनि छन् । त्यसैले उनी आफूलाई लोकपप गायिका भनेर चिनाउँछिन् ।
केही पहिले सरोज लामिछानेसँग एउटा काठेभाकाको लोकदोहारी गाएकी थिइन् यनले । त्यो ठिकठिकै भयो । अहिले फेरि अमृत खातीसँग ‘आलु तामाले’ बोलको लोकदोहोरी गीत ल्याउँदै गरेको उनले जनाइन् । त्यसो त उनलाई आधुनिक, त्यो पनि सेन्टिमेन्टल शैलीको गीतमा बढी मोह छ । अहिले टिकटकको जमाना भएको र अभिनय गर्न र नाच्न पनि सजिलो भएकोले यस्तो गीत ठिक भएको उनी बताउँछिन् ।
‘अहिले मेलोडियस गीत भयो भने टिकटकमा धेरै जान्छ भन्ने सबैको दिमागमा सेट छ’, उनले थपिन्, ‘कुन बेला कुन गीत चल्छ भन्ने थाहा छैन । टिकटकमा जुन गीत चल्यो, त्यही हिट हुन्छ ।’ थुप्रै अवार्ड हात पारेकी उनले यसलाई कर्मको फल मान्छिन् ।
केही अगाडि उनले ‘बतास बनी छुन आइ देउ न’ हल्का रोमान्टिक गीत ल्याएकी थिइन् । त्यो गीत दर्शक श्रोताले रुचाएको र टिकटकमा समेत भाइरल भएकोले रोमान्टिक नम्बर, लभ सङको चाहना आफूमा बढेको खुलाउँछिन् । सोही अनुरुप अर्जुन पोखरेलको शब्द संगीतमा एउटा रोमान्टिक गीत रेकर्ड गरेर भिडियो समेत बनाएकी छन् । गीतको बोल भने सार्वजनिक गर्नु अगाडि बाहिर नल्याउने बताउँछिन् ।
अब आफ्नै स्टुडियो
एक लभ सङको अलवा अहिले उनी हिट गीत ‘बाजा बजाउँदै’ को दोस्रो भाग ‘बाजा बजाउँदै–२’ ल्याउने तयारीमा जुटेकी छन् । केसी गीतको अलावा एप्लस रेकर्ड स्टुडियो समेत सुरु गरेकी छन् । संगीतकार अर्जुन पोखरेल, टिकाराम लगायतसँगको सहकार्यमा गत असोजबाट स्टुडियो थालेकी हुन् ।
गायकलाई आफ्नै स्टुडियो चाहिन्छ र ? प्रश्न राख्न नपाउँदै उनले जवाफ दिइन्, ‘विगत १४/१५ वर्षदेखि सांगीतिक फिल्डमा छु । नयाँ गीत संगीत ल्याइरहेकी छु । गीत संगीतमा अझ धेरै नजिक हुन सकिन्छ कि भनेर स्टुडियो सुरु गरेको हो ।’ गीतसंगीतमा जानकार रहेको, आफ्नै क्षेत्र भएकोले पनि यसमै ब्यवसाय गरेको उनले स्पष्ट पारिन् ।
