एस् ए टी भी २९ चैत्र, काठमाडौँः अमेरिकाको न्युओर्क सहरस्थित हडसन नदीमा बिहीबार हेलिकोप्टर दुर्घटना भएको छ । यस दुर्घटनामा हेलिकोप्टरमा सवार सबै ६ जना यात्रुको मृत्यु भएको बीबीसीको समाचारमा उल्लेख छ ।
अधिकारीहरूले हेलिकप्टरमा पर्यटकको एक परिवार रहेको बताएका छन् । मृत्यु हुनेमा तीन बालबालिका पनि छन् ।
न्युओर्कका मेयर एरिक एडम्सले बिहीबार पत्रकारहरूलाई दिएको जानकारीअनुसार पाँचजना एकै परिवारका स्पेनिस नागरिक थिए । छैटौं व्यक्ति भने पाइलट थिए ।
न्युओर्क प्रहरी आयुक्त जेसिका टिस्चले दुर्घटनाको कारण अनुसन्धान भइरहेको बताइन् । मृतकका परिवारलाई सूचित नगरिएसम्म पीडितहरूको पहिचान खुलासा गरिएको छैन ।
यस दुर्घटनाको भिडिओ फुटेजमा हेलिकोप्टर आकाशबाट उल्टो फर्किएर हडसन नदीमा खसेको देखिन्छ । हेलिकोप्टरले डाउनटाउन स्काईपोर्टबाट उडान भरेको थियो ।
