एस् ए टी भी २४ चैत्र, काठमाडौँः अमेरिकी राष्ट्रपति डोनाल्ड ट्रम्पविरुद्ध देशभर विरोध प्रदर्शन भइरहेको छ। दोस्रो पटक राष्ट्रपति बनेपछि अमेरिकी जनताले ट्रम्पको विरोध गरेको यो पहिलो पटक हो।
यी प्रदर्शन अमेरिकाका सबै ५० राज्यका करिब एक हजार ४०० स्थानमा चलिरहेका छन्। यिनलाई ‘ह्यान्ड्स अफ’ नाम दिइएको छ, जसको अर्थ ट्रम्पले जनताको मामिलामा हात हाल्नुहुँदैन भन्ने हो।
प्रदर्शनकारीहरूले सामाजिक र आर्थिक मुद्दासहित ट्रम्पको कार्यशैलीप्रति आक्रोश व्यक्त गरेका छन्। ट्रम्पले विश्वका धेरै देशमा कर लगाउने घोषणा गरेपछि अमेरिकाबाहिर लन्डन, पेरिस र बर्लिनजस्ता शहरमा पनि प्रदर्शन भएका छन्।
बोस्टनमा केही प्रदर्शनकारीले अमेरिकी विश्वविद्यालयका विद्यार्थीमाथि आप्रवासनसम्बन्धी छापा मारिएको कारण प्रदर्शन गरेको बताए। हालै त्यहाँका केही विदेशी विद्यार्थीलाई पक्राउ गरिएको थियो र उनीहरूलाई देश निकाला गरिएको थियो।
राजधानी वाशिंगटन डीसीमा हजारौं प्रदर्शनकारी डेमोक्र्याटिक सांसदको भाषण सुन्न भेला भए। ती भाषणमा ट्रम्प प्रशासनसँग जोडिएका धनी व्यक्ति एलन मस्कमाथि धेरै टिप्पणी गरियो। अर्बपति मस्क राष्ट्रपति ट्रम्पको सल्लाहकार छन् र उनले सरकारी खर्च र कार्यबल घटाउने कामको नेतृत्व गरिरहेका छन्।
