पाकिस्तान क्रिकेट टोलीका पूर्व कप्तान शोएब मलिकले शनिबार तेस्रो विवाहको घोषणा गरे । त्यसपछि सानिया मिर्जाका पिताले आफ्नी छोरीले ‘खुला’ लिएको बताएका थिए । इस्लाममा 'खुला' भन्नाले आफ्नो पतिलाई स्वेच्छाले छोड्ने महिलालाई बुझिन्छ।
शोएब मलिकले शनिबार आफ्नो सोशल मिडिया ह्यान्डलमा एक पोस्ट गर्दै अभिनेत्री सना जावेदसँग आफ्नो विवाहको घोषणा गरेका थिए । पाकिस्तानका पूर्व क्रिकेट कप्तान शोएब मलिकले आफैंले आफ्नो इन्स्टाग्राममा यो विवाहको तस्बिर पोस्ट गरेका छन् । २८ वर्षीया सना जावेद पाकिस्तानका धेरै शो र म्युजिक भिडियोमा देखा परेकी छिन् ।
यसअघि सन् २०१० मा मलिकले भारतीय टेनिस स्टार सानिया मिर्जासँग विवाह गरेका थिए । उनीहरूको एक छोरा पनि छ। मलिकको घोषणापछि सानिया मिर्जाका बुवा इमरान मिर्जाले यो विवाहअघि नै उनकी छोरी र ४१ वर्षीय पूर्व क्रिकेटरले ‘खुला’ मार्फत डिभोर्स लिएको बताए ।
बुधबार सानिया मिर्जाले एक अस्पष्ट सन्देश पोस्ट गरेकी थिइन् । त्यसपछि उनको शोएब मलिकसँगको सम्बन्ध बिग्रिएको वा दुवैको सम्बन्ध विच्छेद भएको हुनसक्ने अनुमान सुरु भएको थियो । सानियाले लेखेकी थिइन्, ‘विवाह र सम्बन्धविच्छेद दुवै गाह्रो छ, तपाईंले आफ्नो कठिन विकल्प रोज्नुपर्छ ।’
