टोक्योस्थित हानेदा विमानस्थलमा अवतरण गरेलगत्तै जापान एअरलाइन्सको एउटा यात्रुवाहक विमानबाट आगोको मुस्लो निस्किएको देखिएको छ।
जापानको प्रसारक एनएचकेले देखाएको भिडिओ फुटेजमा मुस्लो विमानको झ्याल र तलपट्टिबाट आएको देखिन्छ।
विमानबाट यात्रुहरू छिटोछिटो निस्किरहेको पनि देखिएको छ।
एनएचके र रोयटर्स समाचारसंस्थाले जापान एअरलाइन्सलाई उद्धृत गर्दै विमानमा सवार सबै ३७९ यात्रुको उद्धार गरिएको जनाएका छन्।
विमानस्थलको धावनमार्गमा समेत आगो देखिएको छ।
घटनाबारे हामीलाई के थाहा छ?
धावनमार्गमा आगो निभाउन अग्निनियन्त्रकहरूले प्रयास गरिरहेका छन्।
अधिकारीहरूलाई उद्धृत गर्दै एनएचकेले अवतरणलगत्तै उक्त विमान अर्को विमानसँग ठोक्किएको हुन सक्ने जनाएको छ।
विवरणहरूमा उक्त विमान जापानी तटरक्षक विमानसँग ठोक्किएको जनाइएको छ।
जेएएल५१६ विमान उत्तरी जापानको होकाइदोबाट आएको विवरणहरूमा जनाइएको छ।
