खाना पकाउने ग्यास लिक भएर आगलागी हुँदा घाइते भएका गुल्मी क्षेत्र नं. १ का कांग्रेस सांसद डा. चन्द्र भण्डारीलाई थप उपचारका लागि भारतको मुम्बई लैजाने तयारी भइरहेको छ । उनलाई मुम्बईस्थित नेस्नल बर्न अस्पताल लैजाने तयारी भइरहेको छ ।
उनको शरिरको २५ देखि ३० प्रतिशत भाग जलेको हुँदा थप उपचारका लागि मुम्बई लैजान लागिएको हो । कीर्तिपुर बर्न अस्पतालले थप उपचार गर्न मुम्बई लैजान सिफारिस गरिसकेको छ । भण्डारीका स्वकीय सचिव माधव न्यौपानेले उनलाई थप उपचारका लागि मुम्बईस्थित बर्न अस्पताल लैजाने तयारी भइरहेको जानकारी दिए।
उनले भने, ‘उहाँको २५ देखि ३० प्रतिशत भाग जलेको छ । अवस्था जटिल छ । यहाँको अस्पतालमा उपचार गर्न नसकिने भयो । अस्पतालले पनि थप उपचार गर्न मुम्बई लैजान रिफर गरेको छ । उहाँलाई मुम्बई लैजाने तयारी भइरहेको छ ।’
घाइते भण्डारीले भने थप उपचारका लागि मुम्बई जान मानिरहेका छैनन् । परिवारिक सल्लाहपछि जसरी पनि मुम्बई लैजाने निर्णय भएपछि उनलाई जबरजस्ति भएपनि लैजाने तयारी भएको स्वकीय सचिव न्यौपानेले बताए । सँगै घाइते भएकी उनको आमाको अवस्था पनि गम्भिर छ । आमाको शरिर ७५ प्रतिशत जलेको छ । आमालाई थप उपचार गर्न अस्पतालले सिफारिस गरेको छैन ।
स्वकीय सचिव न्यौपानेले भने, ‘उहाँको आमा अवस्था जटिल छ । शरिरको ७५ प्रतिशत भाग जलेको छ । उहाँलाई भने अस्पतालले अन्य ठाउँ लैजाने सिफारिस गरेको छैन । उहाँलाई बचाउन नसकिने अस्पतालको भनाई छ ।’
बुद्धनगरस्थित भण्डारीको निवासमा बुधवार राती ग्यास सिलिण्डरबाट आगलागी भएको थियो । घटनामा परेर भण्डरीसहित उनकी ८६ वर्षीया आमा गम्भिर घाइते भएका थिए । घटना लगतै उपचारका लागि कीर्तिपुरस्थित बर्न अस्पताल लगिएको थियो ।
