तस्बिर : बीबीसी
नयाँदिल्ली — बीबीसीको डकुमेन्ट्री ‘इन्डिया : द मोदी क्वेश्चन’ को प्रसारणमाथि सरकारले लगाएको प्रतिबन्धको प्रतिवाद हुन थालेको छ । विभिन्न विश्वविद्यालयमा गैरभाजपा समर्थित विद्यार्थी संघ संगठनले उक्त डकुमेन्ट्रीको प्रसारण गरेका छन् ।
जवाहरलाल नेहरू विश्वविद्यालय (जेएनयू) मा मंगलबार राति विद्यार्थीको समूहले सार्वजनिक रूपमा उक्त डकुमेन्ट्री हेरेका छन् । त्यसलाई रोक्न जेएनयू प्रशासनले गरेको प्रयास विफल भएपछि युनिभर्सिटी परिसरको विद्युत् आपूर्ति नै घण्टौं बन्द गरिएको थियो ।
पछि विद्यार्थीले मोबाइल र ल्यापटपमार्फत डकुमेन्ट्री चलाएका थिए । त्यही बेला विद्यार्थीमाथि अज्ञात समूहबाट ढुंगा बर्साइएपछि कार्यक्रम बिथोलिएको थियो । उक्त घटनापछि बुधबार जामिया मिल्लिया इस्लामिया युनिभर्सिटीमा पनि डकुमेन्ट्री प्रदर्शन गरिएको छ । त्यहाँबाट ७ जना पक्राउ परेका छन् । हैदराबाद युनिभर्सिटीमा पनि डकुमेन्ट्रीको प्रदर्शन गरिएको छ । केरलमा कंग्रेस आईसहित केही पार्टीले उक्त डकुमेन्ट्री प्रसारण गर्ने घोषणा गरेका छन् ।
सूचना एवं प्रसारण मन्त्रालयले बीबीसीको डकुमेन्ट्रीले भारतको छवि बिगार्ने कोसिस गरेको भन्दै त्यसको प्रसारणमा रोक लगाएको छ । सन् २००२ मा गुजरातमा भएको हिन्दु–मुस्लिम दंगाका बेला नरेन्द्र मोदी त्यहाँको मुख्यमन्त्री थिए । डकुमेन्ट्रीमा मोदीको भूमिकाप्रति प्रश्न उठाइएको र उनीबारे नकारात्मक चित्रण गरिएको छ । बीबीसीले १७ जनवरीमा उक्त डकुमेन्ट्रीको पहिलो भाग रिलिज गरेको थियो ।
