एस् ए टी भी १३ भाद्र २०८२, काठमाडौँः उच्च शिक्षामा छात्राको पहुँच बढाउन र नियमित पठनपाठनमा प्रोत्साहित गर्न मटिहानी नगरपालिकाले साइकल वितरण गरेको छ ।
नगरपालिका अन्तर्गत रहेको श्रीराम माध्यमिक विद्यालय, मटिहानी–११ मा अध्ययनरत कक्षा ११ का ५८ जना छात्रालाई बिहीबार साइकल वितरण गरिएको हो ।
नगरपालिकाको नीति तथा कार्यक्रमअनुसार शिक्षामा छात्राको आकर्षण बढाउन यो कार्यक्रम सञ्चालन गरिएको नगरप्रमुख हरिप्रसाद मण्डलले बताए ।
नगरप्रमुख मण्डल र महोत्तरीका प्रमुख जिल्ला अधिकारी नारायण प्रसाद रिसालले संयुक्त रूपमा छात्राहरूलाई साइकल हस्तान्तरण गरेका हुन् ।
कार्यक्रममा नगरप्रमुख मण्डलले मटिहानी नगरमात्र नभई छिमेकी नगरपालिका र गाउँपालिका क्षेत्रका छात्रा पनि उक्त विद्यालयमा अध्ययन गर्न आउने गरेको बताउँदै साइकल वितरणले उनीहरूलाई सहज हुने विश्वास व्यक्त गरे । विगत सात वर्षदेखि कक्षा ११ का छात्रालाई साइकल वितरण हुँदै आएको जनाउँदै उनले यो कार्यक्रम सञ्चालन भएपछि छात्राको संख्या क्रमशः बढेको उल्लेख गरे ।
त्यसैगरी, प्रमुख जिल्ला अधिकारी रिसालले नगरपालिकाले शिक्षामा गरेको लगानीको प्रशंसा गर्दै साइकल वितरणले छात्राहरूलाई विद्यालय नियमिततामा सहयोग पुग्ने विश्वास व्यक्त गरे ।
विद्यालयका प्रधानाध्यापक श्रीश कुमार मिश्राले कक्षा ११ का ५८ जना छात्रालाई साइकल वितरण गरिएको जानकारी दिए । हाल उक्त विद्यालयमा मटिहानीसहित सिमरदही, बहुअर्वा, सुगा, पर्सापतैली, सिरसिया, धिरापुर तथा धनुषाको तुल्सियाही, मुखियापट्टी मुसरनियालगायतका क्षेत्रका विद्यार्थी अध्ययनरत छन् ।
साइकल वितरण कार्यक्रममा जिल्ला प्रहरी कार्यालय महोत्तरीका प्रमुख प्रहरी उपरीक्षक हेरम्ब शर्मा, नगरपालिकाका विभिन्न वडाध्यक्षहरू, महोत्तरी उद्योग वाणिज्य संघका उपाध्यक्ष पवन साह र अजय कुमार साह लगायतको समेत उपस्थिति थियो ।
