अमेरिकी अधिकारीहरुको नेपाल आउजाउ निकै बाक्लिएको छ । सोही क्रममा आज बिहान उपसहायक मन्त्रीको टोली आउँदै छ भने अस्ति आएको जर्नेल नेतृत्वको टोली साँझ फर्कंदै छ ।
दक्षिण तथा मध्य एशियाका लागि उपसहायक मन्त्री अफ्रिन अख्तर बिहान साढे ११ बजे काठमाडौं आइपुग्दै छिन् । उनी ढाकाबाट विमान बंगलादेशको उडानमा काठमाडौं आउने कार्यक्रम छ ।
अस्तिदेखि काठमाण्डौमा रहेका इण्डो प्यासिफिक कमाण्डका कमाण्डर एड्मिरल जोन सी अक्विलिनो भने साँझ ५ बजे फर्कंदैछन् । वायुसेनाको विशेष विमानमा अक्विलिनो श्रीमतीसहित १७ जनाको टोली लिएर अस्ति साँझ आइपुगेका थिए ।
उनले काभ्रेपलाञ्चोकको पाँचखालस्थित वीरेन्द्र शान्तिकार्य तालिम केन्द्रमा जारी शान्ति प्रयास ४ अभ्यासको हिजो निरीक्षण तथा अवलोकन गरेका थिए । अभ्यासमा नेपाल,अमेरिकासहित १९ राष्ट्रका सैनिक सहभागी छन् । हिजै उच्चस्तरीय भेटघाटमा सहभागी भएका उनी आज फर्कने कार्यक्रम छ ।
