पूर्वमन्त्रीसमेत रहेका राष्ट्रिय स्वतन्त्र पार्टी (रास्वपा)का सभापति रवि लामिछानेले नेपालका लागि चिनियाँ राजदूत छन् सोङसँग भेटवार्ता गरेका छन् ।
आज वनस्थलीस्थित रास्वपा मुख्यालयमा भेटवार्ता भएको हो । भेटमा सो पार्टीको अन्तर्राष्ट्रिय सम्बन्ध विभाग प्रमुख शिशिर खनाल,पूर्वाधार विकास विभाग प्रमुख निशा डाँगीलगायतको सहभागिता रहेको जनाइएको छ ।
रास्वपाले सम्पन्न गरेको ३ दिने दबाब यात्रा, पूर्व-पश्चिम राजमार्गअन्तर्गत नारायणगढ-बुटवल सडक खण्डको स्तरोन्नतिमा भइरहेको विलम्ब र नागरिकले खेप्नु परेको सास्तीबारे सरकारको ध्यानाकर्षण गराउने कार्यक्रमका बारेमा राजदूत सोङसँग कुराकानी भएको सांसदसमेत रहेकी डाँगीले जानकारी दिएकी छन् ।
सो सडक निर्माणमा ढिलाइ हुनुको विविध कारणबारे छलफल भएको तथा थप ढिलाइ नहुन चालिनुपर्ने कदम र निर्वाह गरिनुपर्ने भूमिकाबारे विस्तृत कुराकानी भएको पनि उनले बताइन् ।
आयोजना छिटो सम्पन्न गर्न आफ्नो तर्फबाट आवश्यक पहल गर्ने राजदूत साेङले प्रतिबद्धता जनाएको बताइएको छ । नारायणगढ-बुटवल सडक खण्ड स्तरोन्नतिको काम चिनियाँ ठेकेदार कम्पनीले गरिरहेको छ ।
