राष्ट्रपति विद्यादेवी भण्डारी आज हेटौँडा आउने भएकी छिन् । हेटौँडा– १ मा रहेको हेटौँडा अस्पतालको नयाँ भवनको उद्घाटनका लागि राष्ट्रपति भण्डारी हेटौँडा आउन लागेकी हुन् ।
हेटौँडा अस्पताल व्यवस्थापन समितिका अध्यक्ष एवं मदन भण्डारी स्वास्थ्य विज्ञान प्रतिष्ठानका रजिस्ट्रार राजेश प्रसाईंले राष्ट्रपति भण्डारीको हेटौँडा आउने कार्यक्रमको सम्पूर्ण तयारी पूरा भएको जानकारी दिए ।
उनले अस्पतालको नवनिर्मित भवनको उद्घाटनका लागि राष्ट्रपति हेटौँडा आउन लागेको जानकारी दिँदै उद्घाटन कार्यक्रमको सम्पूर्ण तयारी पूरा भएको बताए । उनले राष्ट्रपति भण्डारी मध्याह्न पौने १२ बजे हेटौँडा आइपुग्ने समय तालिका रहेको जानकारी दिए ।
राष्ट्रपति भण्डारी हेटौँडा आउने भएपछि सुरक्षा व्यवस्था कडा पारिएको जिल्ला प्रशासन कार्यालय मकवानपुरले जानकारी दिएको छ ।
