रुसी सेनामा भर्ती भएका नेपाली नागरिकलाई स्वदेश फर्काउन माग गर्दै आन्दोलन चर्काइरहेकाहरुले आज प्रधानमन्त्रीसँग भेट गरेका छन् ।
'रुसी सेनामा आबद्ध नेपालीकाे जीवनरक्षार्थ अभियान'को अगुवाइमा केही दिनयता भृकुटीमण्डपमा सामूहिक आमरण अनशन बसिरहेका उनीहरुले आज बिहान प्रधानमन्त्री निवास बालुवाटार पुगेर प्रधानमन्त्री पुष्पकमल दाहाल प्रचण्डसँग भेट गरेका हुन् । अभियानका संयोजक कृतु भण्डारीसहित १० जनाको टोलीले बिहान साढे ८ बजे प्रधानमन्त्रीसँग भेटघाट गरेको बताइएको छ।
रुसी सेनामा रहेका नेपालीको सकुशल उद्धार गरी स्वेदश फिर्ता ल्याउनुपर्ने, युद्धमा घाइतेको उचित उपचार र क्षतिपूर्तिको व्यवस्थापन गरिनुपर्ने, युक्रेनको कब्जामा रहेका पाँच जना युद्धबन्दीको उद्धार तथा मृतकको शव स्वदेश ल्याउन र बेपत्ताको खोजी गर्न माग गर्दै परिवारका सदस्य र आफन्तहरु लामो समयदेखि सडक संघर्षमा छन् । यसअघि उनीहरुले रुसी दूतावासअगाडि धर्नासमेत दिएका थिए ।
