प्रधानमन्त्री पुष्पकमल दाहाल ‘प्रचण्ड’ समक्ष राष्ट्रिय फोटो पत्रकार समूहले विभिन्न मागसहित ज्ञापनपत्र प्रस्तुत गरेको छ । प्रधानमन्त्री निवास बालुवाटारमा बुधबार प्रधानमन्त्री प्रचण्ड लाई राष्ट्रिय फोटोपत्रकार समूहले फोटोपत्रकारको हकहितका लागि सात बुँदे माग राखी ज्ञापनपत्र बुझाएको हो ।
विगत २५ वर्षदेखि फोटो पत्रकारहरूको हकहितका लागि काम गर्दै आएको राष्ट्रिय फोटो पत्रकार समूहले प्रधानमन्त्रीसमक्ष सो ज्ञापनपत्र प्रस्तुत गरेको हो ।
फोटो पत्रकारहरूले भोग्दै आएको कुरासहित फोटो पत्रकारहरूलाई राज्यद्वारा उचित सम्मान, बिमा, फोटो पत्रकारको हकहित र आपत् विपतका साथै फोटो पत्रकारको बौद्धिक विकास तथा तालिमका लागि बजेटको माग गरिएको छ ।
त्यस्तै, क्यामेरा तथा त्यसका इक्युप्मेनट खरिदका लागि सहुलियत ऋण सुविधा उपलब्ध गराउन पनि फोटो पत्रकारहरूले माग गरेका छन् । यस सन्दर्भमा प्रधानमन्त्री प्रचण्डले आफूले सक्ने सहयोग सुनिश्चितता गर्ने प्रतिबद्धता जनाउनुभयो ।
