एस् ए टी भी १६ जेष्ठ, काठमाडौँः पञ्जाबको मुक्तसर जिल्लामा रहेको एक पटाका कारखानामा भीषण विस्फोट हुँदा चार मजदुरको ज्यान गएको छ भने २७ जना गम्भीर घाइते भएका छन्। मृतक र घाइतेहरू अधिकांश उत्तर प्रदेश र बिहारका प्रवासी मजदुर भएको बताइएको छ। कारखाना उत्तर प्रदेशको हाथरसका ठेकेदार राज कुमारको मातहत सञ्चालन भइरहेको थियो, जो घटनापछि फरार छन्।
पञ्जाबको मुक्तसर जिल्लाको लम्बी क्षेत्रअन्तर्गत पर्ने सिँघेवाला–फतूहीवाला गाउँ नजिकैको खेतमा रहेको एक पटाका कारखानामा बिहीबार राति करिब १२ः३० बजे भीषण विस्फोट भएको हो। प्रारम्भिक रिपोर्टअनुसार यस विस्फोटमा ४ जनाको मृत्यु भएको छ भने २७ जना गम्भीर घाइते भएका छन्। घाइतेहरूलाई बठिन्डा स्थित एम्स अस्पतालमा रेफर गरिएको छ।
विस्फोट यति शक्तिशाली थियो कि कारखानाको दुईतले भवन क्षणभरमै भग्नावशेषमा परिणत भएको छ। घटनास्थलमा कारसेर कम्पनीका तयारी पटाका भरिएका बाकसहरू फेला परेका छन्। साथै, हरियाणा नम्बरको एउटा ‘छोटो हात्ती’ सवारी साधन पनि खाली बाकसहरूले भरिएको अवस्थामा भेटिएको छ। विस्फोटको आवाज केही किलोमिटर टाढासम्म सुनिएको थियो।
कारखानामा पटाका निर्माणको जिम्मा उत्तर प्रदेश, हाथरस निवासी ठेकेदार राज कुमारको थियो। उनी हाल घटनापछि फरार रहेको र खोजी कार्य भइरहेको स्थानीय प्रशासनले जानकारी दिएको छ।
