एजेन्सी : इरानले अप्रिल १३ मा कब्जामा लिएको एमएससी एरिज जहाजका सात जना चालक दलका सदस्यलाई रिहा गरेको छ।
पोर्चुगलको झण्डा भएको जहाजका चालक दलका २५ जनामध्ये सात जनालाई इरानले रिहा गरेको पोर्चुगलको विदेश मन्त्रालयले जनाएको छ।
‘पाँच भारतीय, एक फिलिपिनो र एक एस्टोनियन नागरिकलाई आज रिहा गरिएको छ’, मन्त्रालयले विज्ञप्तिमा भनेको छ। अर्का एक चालक दलका महिला सदस्यलाई पहिले नै रिहा गरिएको थियो।
पोर्चुगलले इरानको यो कदमको स्वागत गर्दै बाँकी १७ चालक दलका सदस्यलाई पनि रिहाइको माग गरेको छ।
पोर्चुगलले १६ अप्रिलमा इरानका राजदूतलाई बोलाएर जहाज र चालक दलका सदस्यलाई रिहा गर्न माग गरेका थिए। इरानले २७ अप्रिलमा चालक दलका सदस्य रिहा गर्नेबारेमा विचार गरिरहेको बताएको थियो।
दुई देशका विदेशमन्त्रीबीच १० दिनअघि टेलिफोनमा वार्ता भएको थियो।
इजरायलसँग जारी तनावका बीच इरानले पोर्चुगलको झण्डा भएको जहाज कब्जा गरेको हो। जहाजका मालिकसँग इजरायली सम्बन्ध भएको इरानको आरोप छ।
इरानी सेनाले इजरायलविरुद्ध ठूलो मात्रामा ड्रोन आक्रमण गरिरहेको बेला यो घटना भएको थियो।
सिरियाको दमाशकसमा भएको इरानी कुटनीतिक भवनमा इजरायली सेनाले गरेको आक्रमणमा सात इरानी सेना मारिएपछि इरानले इजरायलविरुद्ध आक्रमण गरेको थियो।
