तस्बिर : रोयटर्स
पेरिस — फ्रान्स सरकारको पेन्सन सुधार विधेयकविरुद्ध श्रमिक, मजदुरहरूले हडताल गरेका कारण पेरिस सहरभरि फोहोरको थुपो नै थुप्रो लागेको छ । सरकारको विधेयकविरुद्ध हडतालमा उत्रिएका कर्मचारीले ११ दिनदेखि फोहोर मैला नउठाइदिँदा पेरिस पुरै दुर्गन्धित बनेको छ र फोहोरका कारण घरघरै मुसा लाग्न थालेको गुनासो सर्वसाधारणले गरेका छन् ।
'म दिउँसो पेरिस गएकि थिएँ । गन्हाएर हिँड्न सकिन्न । मानिसहरु मुसाको बिगबिगी सुरु भएको भनेर आक्रोशित छन्। पर्यटकहरू यात्रा छोट्याएर फर्किएका छन्,' बीएनबी बैंककी कर्मचारी लोरा डेबासले भनिन् ।
अचम्म त के छ भने पेरिस महानगरपालिकाले नै यो हडतालको पक्षमा समर्थन गरेको छ । सरकार मध्यमार्गी दलको छ भने पेरिस महानगरपालिका प्रमुखसहित महानगरपालिकामा बहुमत समाजवादी दलको भएकाले महानगरपालिका विधेयकको विरोधमा रहेको हो ।
टीएफ-१ का अनुसार अहिलेसम्म करिब नौ हजार टन फोहोर सडकमा थुप्रिएको छ । पेरिसमा नगरपालिकाको फोहोर संकलनकर्ताहरूले गरेको आलोपालो हडतालले मुसालाई आकर्षित गर्ने र पर्यटकहरूलाई लखेट्ने काम गरेको छ ।
रेल सेवा, विद्यालयहरू, सार्वजनिक सेवाहरू र बन्दरगाहहरू विगत ६ हप्तामा हडतालबाट प्रभावित भएका छन् । यही विधेयकविरुद्ध दशकहरूकै सबैभन्दा ठूलो विरोध प्रदर्शनहरूसमेत भएका छन्।
विधेयक पास गरिसकेपछि प्रधानमन्त्री एलिजाबेथ बोर्नले फ्रान्सको टीए- १ टिभीलाई संक्षिप्त अन्तर्वार्ता दिँदै आफ्नो सरकारको बचाउ गरेकी छन् । उनले संसद्मा पटक-पटक गरेर १७६ घण्टासम्म यही विधेयकका पक्ष-विपक्षमा बहस गरेको, यो विधेयक भावी सन्ततिका लागि पनि नभई नभएको, देशलाई थप आर्थिक बोझ नबोकाउन पनि आवश्यक रहेकोले पास गर्नैपर्ने उल्लेख गरेकी छन् ।
विभिन्न दलहरुसितको छलफलबाट विपक्षी रिपब्लिकन पार्टी (एल आर) ले विधेयकका पक्षमा मतदान गर्ने भनेर सहमति गरेको तर उक्त दलका केही सांसदले सहमति तोडेर निजी स्वार्थका कारण धोका दिने अवस्था सिर्जना भएपछि सरकारले संवैधानिक अधिकार प्रयोग गरेर राष्ट्र र जनताको हितका लागि विधेयक अगाडि बढाएको बताइन् ।
