सर्लाहीको गोडैतामा एक युवक मृत अवस्थामा फेला पर्नुभएको छ । बलरा नगरपालिका–९ का २९ वर्षीय अशोक महतो गोडैता नगरपालिका –६ स्थित सडक छेउमा रहेको रामसागर महतोको उखु खेतमा मृत फेला पर्नुभएको हो । बिहीबार अपराह्न पौने ५ बजेतिर युवकको शव देखेपछि स्थानीयले प्रहरीमा खबर गरेका थिए ।
घटनास्थलमा पुग्नुभएका जिल्ला प्रहरी कार्यालय सर्लाहीका प्रवक्ता एवं प्रहरी नायब उपरीक्षक (डिएसपी) दीपेन्द्र पजियारले मृतक अशोकको शरीरमा कुनै बाहिरी चोटपटक नदेखिएको बताउनुभयो । उहाँका अनुसार घटनास्थलको प्रकृति मुचुल्का गरी मृतक युवकको शव पोष्टमार्टमका लागि बिहीबार साँझ अबेर प्रादेशिक अस्पताल मलङ्गवा ल्याइएको छ ।
युवकको मृत्युको कारण पत्ता लगाउन अनुसन्धान भइरहेको प्रनाउ पजियारले बताउनुभयो । भारतमा बसेर मजदुरी गर्नुहुने अशोक करिब एक महिनाअघि मात्रै घर आउनुभएको थियो ।
