जापानका रक्षामन्त्री यासुकाजु हमादाले अमेरिकासँग टोमाहक क्रुज क्षेप्यास्त्रहरू किन्ने सम्झौतामा हस्ताक्षर गरिने घोषणा गरेका छन् ।
सन् २०२३ भित्रै ती हतियारहरू किन्न सकिने सम्भावना छ ।
जापान सरकारले सबै क्षेप्यास्त्रहरू एकैपटक किन्ने हमादाले बताए । शुरूमा कैयौं वर्ष लगाएर विभिन्न जत्थामा हतियार किन्ने योजना बनेको भए पनि अब एकैपटकमा किन्न लागिएको उनको भनाइ छ ।
जापानी समाचार संस्थाको खबरअनुसार, जापानले ५०० वटा जति टोमाहक क्षेप्यास्त्र किन्न खोजेको छ ।
चीन र उत्तर कोरियाबाट तेर्सिएको जोखिमको सामना गर्नका लागि जापानको प्रत्याक्रमण क्षमता बढाउने हिसाबले यी क्षेप्यास्त्रहरू किन्न लागिएको हो । गत डिसेम्बर महिनामा ग्रहण गरिएका तीन महत्त्वपूर्ण सुरक्षा दस्तावेजमा प्रत्याक्रमण क्षमता अभिवृद्धि गरिने उल्लेख थियो ।
टोमाहक क्षेप्यास्त्रको दायरा १६ सय किलोमिटर हो । यी क्षेप्यास्त्रहरू जापानबाट प्रहार गरिएमा चिनियाँ तटसम्म पुग्न सक्छन् । जापानले आफ्नै हतियार प्रणाली विकसित नगरुन्जेल क्षेप्यास्त्र शक्तिलाई कायम राख्न यी अमेरिकी क्षेप्यास्त्रहरू उपयोगी हुने बताइएको छ ।
