म्याड्रिड । स्पेनको दक्षिणी क्षेत्रमा आइतबार साँझ भएको एक भयावह रेल दुर्घटनामा कम्तीमा ४० जनाले ज्यान गुमाएका छन् । ३१७ जना यात्रु बोकेर मालागाबाट राजधानी म्याड्रिडका लागि छुटेको उक्त रेल कोर्डोवा सहर नजिकैको अदामज भन्ने स्थानमा लिकबाट बाहिरिएर दुर्घटनामा परेको हो ।
दुर्घटनामा ४८ जना घाइते भएका छन् । अस्पताल भर्ना गरिएका घाइतेमध्ये धेरैको अवस्था चिन्ताजनक रहेकाले मृतकको सङ्ख्या अझै बढ्न सक्ने स्वास्थ्य अधिकारीहरूले चिन्ता व्यक्त गरेका छन् । अन्डालुसिया क्षेत्रीय सरकारका प्रमुख जुआन्मा मोरेनोका अनुसार रेल लिकबाट बाहिरिँदा भएको ठक्कर यति शक्तिशाली थियो कि केही यात्रुहरू उछिट्टिएर घटनास्थलबाट सयौँ मिटर टाढासम्म पुगेका थिए ।
भयानक त्रासदी लगत्तै स्पेनका प्रधानमन्त्री पेड्रो सान्चेजले आफ्नो पूर्व निर्धारित कार्यक्रम रद्द गरी घटनास्थलको निरीक्षण गरेका छन् । उनले घटनाप्रति गहिरो दुःख व्यक्त गर्दै देशभर तीन दिने राष्ट्रिय शोकको घोषणा गरेका छन् । प्रधानमन्त्री सान्चेजले पीडित परिवारलाई सान्त्वना दिँदै घटनाको निष्पक्ष र पारदर्शी ढङ्गले छानबिन गर्ने प्रतिबद्धता समेत जनाएका छन् ।
प्रारम्भिक अनुसन्धानमा अधिकारीहरूले चालकको त्रुटि हुने सम्भावनालाई लगभग अस्वीकार गरेका छन् । भर्खरै नयाँ ट्रयाक बिछ्याइएको सीधा खण्डमा दुर्घटना भएकाले पूर्वाधारमा भएको कमजोरी वा रेलको प्राविधिक गडबडीलाई केन्द्रमा राखेर विस्तृत अनुसन्धान सुरु गरिएको छ ।
