काठमाडौं । भारतीय टोलीले आजदेखि त्रिशूलीमा खसेर बेपत्ता भएका दुईवटा बस र त्यसमा सवार यात्रुको खोजी सुरु गरेको छ ।
भारतको नेसनल डिजास्टर रेस्पोन्स फोर्स (एनडीआरएफ) को १२ सदस्यीय टोली खोजतलासमा जुटेको हो । प्रमुख जिल्ला अधिकारी इन्द्रदेव यादवका अनुसार भारतीय टोलीले अत्याधुनिक उपकरण प्रयोग गरेको छ ।
यादवले बेपत्ता भएकाहरुको खोजी अब सहज हुने भन्दै आशा बढेको बताए । बेपत्ता भएका आफन्तहरुले पनि आफन्तको शव भेटिनेमा आशा जागेको बताएका छन् ।
नेपाली टोलीले लगातार खोजी कार्य जारी राख्दा पनि उल्लेख्य सफलता हासिल नगरेपछि नेपाल सरकारले भारतीय टोलीसँग सहयोग मागेको हो ।
अत्याधुनिक उपकरणसहितका जनशक्ति नहुँदा सरकारको अनुरोधमा भारतबाट टोली नेपाल आएको हो । गत असार २८ गते शुक्रबार दुईवटा बस त्रिशुली नदीमा खसेका थिए ।
दुई बसमा सवार ६५ यात्रुमध्ये तीनजना पौडेर बाचेका छन् भने ६२ जना बेपत्ता भएका थिए । अहिलेसम्म २५ जनाको शव फेला पारिएको छ । भेटिएका शवमध्ये १७ जनाको सनाखत भइसकेको छ ।
