एस् ए टी भी २६ असार, काठमाडौँः भारतको राजधानी दिल्ली र त्यस वरपरको क्षेत्र (एनसीआर) बिहीबार बिहान एक हल्कापुरण भूकम्पको झट्काले हल्लिएको छ। बिहान ठीक ९:०४ बजे भूकम्पको धक्का महसुस गरिएको हो, जुन केही सेकेन्डसम्म कायम रह्यो।
भारतको राष्ट्रिय भूकम्प विज्ञान केन्द्र (National Center for Seismology) का अनुसार, भूकम्पको केन्द्रविन्दु दिल्ली नजिकै पर्ने हरियाणाको झज्जर जिल्ला हो, जहाँ रिक्टर स्केलमा ४.४ म्याग्निच्युडको कम्पन मापन गरिएको थियो। झज्जर दिल्लीबाट करिब ६० किलोमिटर टाढा पर्दछ।
भूकम्पको धक्का दिल्ली, नोएडा, गाजियाबाद, गुरुग्राम, र फरीदाबाद लगायतका एनसीआरका विभिन्न भागमा महसुस गरिएको थियो। साथै, हरियाणाका सोनीपत, रोहतक र हिसारमा पनि झट्का आएको जनाइएको छ।
भूकम्पको धक्का महसुस गरेपछि धेरै मानिसहरूले सामाजिक सञ्जाल एक्स मा आफ्नो घर वा छिमेकमा भएको कम्पनको दृश्य साझा गरेका छन्।
यो भूकम्प दिल्ली-एनसीआर क्षेत्रमा बुधबार परेको भारी वर्षा र त्यसले निम्त्याएको जलमग्नता तथा ट्राफिक जामपछिको अर्को प्राकृतिक झट्का हो। पछिल्लो केही दिनदेखि त्यहाँ चर्को गर्मी र आर्द्रताले सताएको थियो।
दिल्ली प्रहरीले एक्स मा पोस्ट गर्दै हालसम्म कुनै पनि किसिमको क्षति नभएको जानकारी दिएको छ। उक्त पोस्टमा भनिएको छ, “यस बिहान दिल्ली-एनसीआरमा आएको भूकम्पका कारण हालसम्म कुनै क्षतिको सूचना प्राप्त भएको छैन। सम्पूर्ण दिल्लीवासीको कुशलताको कामना गर्दछौं।”
दिल्ली भारतको भूकम्पीय नक्साअनुसार 'Zone IV' मा पर्ने क्षेत्र हो, जसले मध्यम स्तरको भूकम्पको जोखिम संकेत गर्दछ। दिल्लीमा प्रायः हिमालय, अफगानिस्तान वा चीनबाट उत्पत्ति भएका भूकम्पका झटका महसुस गरिँदै आएको इतिहास छ।
