एस् ए टी भी १३ भाद्र २०८२, काठमाडौँः देशभरका यातायात व्यवसायीको छाता संस्था नेपाल यातायात व्यवसायी राष्ट्रिय महासङ्घको काठमाडौँ जिल्ला अध्यक्षमा सुरेश श्रेष्ठ निर्वाचित भएका छन् ।
महासङ्घको आज सम्पन्न सातौँ जिल्ला अधिवेशनबाट श्रेष्ठको अध्यक्षतामा नयाँ कार्यसमिति सर्वसम्मत निर्वाचित भएको हो । सचिवमा हरिशचन्द्र श्रेष्ठ र कोषाध्यक्षमा राजन श्रेष्ठ निर्वाचित भएका महासङ्घका बागमती प्रदेश संयोजक सुवन गिरीले जानकारी दिए ।
यस्तै सदस्यमा नविना खड्का, रामकुमार केसी, टीका कार्की, जय दाहाल, रुपेश श्रेष्ठ, कृष्णप्रसाद घिमिरे, चित्र भट्ट, खिलबहादुर श्रेष्ठ, दुर्गा सारु मगर र उद्धव खड्का निर्वाचित भएका छन् ।
राजधानी काठमाडौँमा भएका झण्डै २०० यातायात समिति तथा कम्पनीको प्रतिनिधित्व गर्दै उक्त समिति निर्वाचित भएको हो । अधिवेशनको महासङ्घका केन्द्रीय अध्यक्ष विजयबहादुर स्वाँरले उद्घाटन गरेका थिए ।
