काठमाडौं प्रहरी प्रमुख एसएसपी विश्व अधिकारीका अनुसार आर्थिक वर्ष २०८०/२०८१ मा १ हजार ६७ जना मात्र फरार अभियुक्त पक्राउ परेका थिए । जुन ४२३ प्रतिशत अर्थात् पाँच गुणाले बढी हो । प्रहरीले आर्थिक वर्ष २०८१/०८२ मा २४ करोड २० लाखभन्दा बढी जरिवाना संकलन गरेको छ । एसएसपी अधिकारी यो उपलब्धिले देशभरको नतिजामा महत्त्वपूर्ण योगदान पुर्‍याएको बताउँछन् । नेपाल प्रहरीले देशभरिबाट २०८१/०८२ मा २४ हजार ३ सय ८२ जना फरार अपराधीलाई पक्राउ गरेको थियो । देशभरिको तथ्यांकहेर्दा काठमाडौं प्रहरीले झन्डै २३ प्रतिशत फरार अपराधी पक्राउ गर्न सफल भएको देखिन्छ ।

‘एकै जिल्लाबाट हजारौँ फरार अपराधी पक्राउ हुनु प्रहरी संगठनप्रतिको जनविश्वास मजबुत छ भन्ने पनि हो,’ एसएसपी अधिकारीले भने,‘विशेषगरी राजधानीमै कानुनी शासनको कार्यान्वयनमा यो संख्याले कानुनभन्दा माथि कोही छैन भन्ने सन्देश बलियो बनाएको छ।’

आर्थिक वर्ष २०८१/२०८२ मात्र काठमाडौंमा प्रहरी परिसरमा १२ हजार ९ सय १५ मुद्दा दर्ता भएकोमा ८ हजार ५ सय २० जना पक्राउ परेका थिए । काठमाडौंमा अपराधको ग्राफ पनि बढेको प्रहरीकै तथ्यांकले देखाउँछ । जस अनुसार आर्थिक वर्ष २०७८/२०७९ मा ८ हजार ९ सय ७७ मुद्दा, २०७९/२०८० मा १३ हजार ४ सय ६४ मुद्दा र २०८०/२०८१ मा १२ हजार ८ सय ७२ मुद्दा दर्ता भएका छन् ।

काठमाडौं प्रहरी परिसरमा अहिले प्रहरी दरबन्दी ४ हजार १६ भए पनि कार्यरत संख्या ३ हजार २३३ मात्र छ । जसमा ४ सय ९ जना महिला र २ हजार ८ सय २४ जना पुरुष रहेका छन् । परिसरले दैनिक शान्ति सुरक्षाका लागि मोबाइल सीआरभी, मोटरसाइकल गस्ती, पैदल गस्ती, प्रहरी चेकिङ, पिकेट र अनुगमनमा पटकपटक गरेर २ हजार ५ सय २१ जनशक्ति परिचालित गरेको छ । दैनिक ५ सय ५२ ठाउँमा प्रहरीको उपस्थिति रहने गरेको एसएसपी अधिकारीले जानकारी दिए । उनका अनुसार प्रहरीको १०० नम्बरमा आर्थिक वर्ष २०८१/८२ मा मात्र ४ लाख २८ हजार ९६ फोन आएको तथ्यांक छ । जुन फोनमा झगडा सम्बन्धी सबैभन्दा बढी सूचना आएको थियो ।