काठमाडौँ । बिहीबारदेखि एकसाथ तीन फिल्म प्रदर्शनमा आएको छ । ‘गोबर गणेश’, ‘मिरमिरे’ र ‘भाइरल गोर्खे’ एकापसमा भिड्नेगरी प्रदर्शनमा आएका हुन् । 

नेपालमा नयाँ फिल्म रिलिज शुक्रबार गर्ने परम्परा रहँदै आएको छ । तर आज माघे सङ्क्रान्ति भएकाले बिहीबार नै यी सबै फिल्म प्रदर्शनमा आएको बताइएको छ । 

यी तीन फिल्मले हलमा शो भने फरक फरक पाएका छन् । ‘गोबर गणेश’मा सामाजिक विषयवस्तु,‘मिरमिरे’मा पारिवारिक भावना  र ‘भाइरल गोर्खे’ मा समसामयिक विकृतिलाई उतारिएको निर्माण पक्षको भनाइ छ । 

गोबर गणेश

एक युवाले आमाको लागि गर्ने सङ्घर्षको कथामा ‘गोबर गणेश’ बनेको हो । हास्य कलाकार मरिचमान श्रेष्ठ (बल्छी धुर्बे) को निर्देशन रहेको फिल्मले गाउँबाट सपना बोकेर सहर छिरेको एक युवकको काठमाडौँ छिरेपछि कसरी सपना चकनाचुर हुन्छन् र उसले जीवन धान्न कति सङ्घर्ष गर्नुपर्छ भन्ने समेत देखाइएको छ । बल्छी ध्रुवेको यो निर्देशनमा डेब्यु फिल्म हो ।

फिल्ममा बल्छी ध्रुवेकै मुख्य भूमिका छ । वर्षा सिवाकोटी, निर्मल शर्मा, बुद्धि तामाङ, माओत्से गुरुङ लगायतको सशक्त अभिनय पनि फिल्ममा देख्न सकिन्छ । बल्छी ध्रुवे फिल्म्सको ब्यानरमा निर्माण भएको यो फिल्मलाई आम नेपाली युवाको कथा भएको दाबी गरिएको छ । फिल्म पनि बल्छी ध्रुवेले नै निर्माण गरेका हुन् ।

मिरमिरे

बाबु–छोरीको सम्बन्ध र त्रिकोणात्मक प्रेम कथा ‘मिरमिरे’ले पस्किएको छ । यम शेर्पाको लेखन तथा निर्देशनमा बनेको यो फिल्मले आमाको अभावमा छोरीले महसुस गर्ने रिक्तता र बाबुले निर्वाह गर्ने दोहोरो भूमिका पनि देखाउनेछ । फिल्ममा दयाहाङ राई, प्रकाश सपूत र सिर्जनाबिचको त्रिकोणात्मक प्रेमकथा पनि समेटिएको छ ।  फिल्ममा माओत्से गुरुङ, भोलाराज सापकोटा, छुल्ठिम गुरुङ लगायतको अभिनय पनि देख्न सकिन्छ । यार्सा फिल्मसको ब्यानरमा निर्माण भएको यो फिल्मको निर्माता निमु शेर्पा, छोङ्बा लामा शेर्पा र आङछिरिङ शेर्पा हुन् ।

भाइरल गोर्खे

सामाजिक सञ्जालमा ‘भाइरल’ बन्नका लागि मानिसहरूले गर्ने हर्कत र त्यसले निम्त्याउने कथामा फिल्म ‘भाइरल गोर्खे’ निर्माण भएको छ । फिल्मले वर्तमान सामाजिक सञ्जालको अवस्थालाई व्यङ्ग्यात्मक शैलीमा प्रस्तुत गरेको छ ।

निगम श्रेष्ठको निर्देशन रहेको फिल्ममा सौगात मल्ल र सृष्टि श्रेष्ठ मुख्य भूमिकामा छन् । पर्दा बाहिरको सम्बन्धमा उतार चढाव आए पनि यो जोडी पर्दामा भने एकसाथ देखिँदै आएका छन् ।

फिल्ममा बुद्धि तामाङ, लक्ष्मी गिरी, राजाराम पौडेल र सामाजिक सञ्जालकी चर्चित पात्र ‘मिस पवि’ को समेत अभिनय रहेको छ । फिल्मका निर्माता अमित श्रेष्ठ, विशाल ताम्राकार, महेश लामिछाने र केवल जङ्ग कुँवर हुन् ।