बागलुङ, कात्तिक २६ गते । पञ्चकोटमा निर्माण गरिने एक सय ३५ फिट अग्लो कलस निर्माण अभियान सफल पार्न असार २२ गतेदेखि सुरु भएको चौमासिक महायज्ञ समापन भएको छ । चार महिनादेखि विष्णु सहश्रनामलाई १४ लाख पटक पाठ गरिएको थियो ।
महायज्ञको समापन गर्दै कलस निर्माणसहित पञ्चकोटका गतिविधि सञ्चालन गर्न काम थालिने भएको हो । बागलुङ नगरपालिका वडा नं. ५ को मालिकामा रहेको गण्डकी गोपाल गोबंश संरक्षण केन्द्रमा चौमासिक अखण्ड श्रीविष्णु सहश्रनाम पाठ पारायणको महापूर्णहुती तिलक प्रसाद वितरण, महाअभिषेक एवम् सम्मान कार्यक्रम समेत गरिने भएको हो ।
२०७१ सालमा शिलान्यास भइ निर्माण प्रारम्भ भएको यो स्थानमा धेरै मठमन्दिर बनिसकेका छन् । कालीगण्डकी सभ्यताको संरक्षण गर्ने, जलसम्पदाको संरक्षणको प्रतिक स्वरुप कलस निर्माण गर्ने काम भइरहेका छन् । राज्यको तर्फबाट आउने बजेटमा पटक पटक कटौती हुँदा धेरै निर्माण आयोजना अलपत्र परेका थिए । स्थानीयले भने पटक पटक दान दिएर यहाँ हरेक वर्ष महायज्ञ सञ्चालन गर्नेदेखि पुर्वाधार निर्माणमा सहयोग गर्दै आएका छन् ।
त्यस बाहेक सर्वसिद्दिधाम पञ्चकोट विकास परिषदमार्फत गण्डकी महासभासहित विभिन्न कार्यक्रम भइरहेका छन् । मुक्तिनाथ पिठाधिश्वर कमलनयनाचार्यको अगुवाइमा एकै वर्षमा आधा दर्जन स्थानमा महायज्ञहरु भइरहेका छन् । जसमध्ये मुक्तिनाथमा मात्रै ६ महिने महायज्ञ एवम् पञ्चमहालक्ष्मी मन्दिर भक्तपुरमा बाल्मिकीय रामायण पाठसहित विभिन्न स्थानमा चारदेखि ६ महिने महायज्ञहरु भइरहेका हुन् । ती महायज्ञहरुको पनि समापन गरेर निर्माण अभियानलाई अगाडि बढाउने परिषदका संस्थापक रहेका कमलनयनाचार्यले बताउनुभयो ।
उहाँले पञ्चकोटमा कलस निर्माणसहित गौशाला थप व्यवस्थापन गर्ने, जडिवुटी प्रशोधन केन्द्र निर्माण, मुक्तिनाथ बाबा परिक्रमा चक्रपथ निर्माण सहितको अभियानलाई एक अर्ब २५ करोड खर्च लाग्ने बताउनुभयो । त्यो रकम राज्यका निमायबाट केही सहयोग जुटाउन सकेमा बाँकी स्थानीयको जोडबलमा निर्माण हुने उहाँले जानकारी दिनुभयो ।
चालु वर्ष आठ करोड रुपियाँको टेण्डरमा केही निर्माणको काम सुरु भएको छ । त्यस बाहेक चक्रपथका लागि एक करोड, गौश्वारा जाने सडकका लागि बजेट विनियोजन भएर काम थालिएको छ । त्यस्तै संसारकोटमा पुरातत्व विभागले अध्ययन थालेको छ ।
यो अभियान पूरा गरेसँगै उहाँले नेपालभित्रै कम्तिमा १० लाख स्थानीय प्रजातीका गाई पालन गर्ने लक्ष्य राख्नुभएको छ । त्यसका लागि राज्यले कम्तिमा १० हजार बिगा जग्गा उपलब्ध गराउनुपर्ने उहाँले बताउनुभयो । उहाँकै अगुवाइमा मालिकामा बनेको गौशालामा ५५ गाई संरक्षित छन् । पर्वतको धाइरिङमा थप ५८ गाई संरक्षण गरिएको छ । नवलपुरको गजेन्द्रमोक्ष धाममा भने दुई सय गाई पालिएका छन् ।
