एस् ए टी भी २० साउन २०८२, काठमाडौँः भारत, उत्तराखण्डको उत्तरकाशीस्थित धरालीमा अतिवृष्टि र भूस्खलनका कारण आएको विनाशकारी बाढीमा परेर एक सयभन्दा बढी मानिस हराइरहेका छन्। राहत र उद्धार कार्य हालसम्म पनि जारी छ।
उद्धारमा प्रहरी, स्थानीय प्रशासन, एनडीआरएफ, एसडीआरएफ, आईटीबीपी, र भारतीय सेनाको टोली परिचालित छन्। विपद् नियन्त्रण कक्षबाट स्थितिको निरन्तर निगरानी भइरहेको छ। उत्तराखण्डका मुख्यमन्त्री पुष्कर सिंह धामीले हेलिकप्टरबाट घटनास्थलको हवाई सर्वेक्षण गरेका छन्।
एनडीआरएफका डीआईजी मोहसेन शहेदीले समाचार एजेन्सी एएनआईलाई भने, ‘प्रारम्भिक जानकारीअनुसार एक सय ५० जनालाई सुरक्षित स्थानमा सारिएको छ। चार जनाको मृत्यु भएको पुष्टि भएको छ, र एक सयभन्दा बढी मानिस घाइते वा हराइरहेका छन्।’ यद्यपि स्थानीय प्रशासनले यसको पूर्ण पुष्टि गरेको छैन। उनले थपे, ‘एनडीआरएफका तीन टोली घटनास्थलमा खटिएका छन्।’
सडक र पुलहरू क्षतिग्रस्त हुँदा उद्धार कार्यमा कठिनाइ भइरहेको छ। हेलिकप्टर, ड्रोन, र अन्य उपकरणहरू प्रयोग गरी राहत सामग्री र चिकित्सा सहायता प्रदान गरिएको छ।
