एस् ए टी भी २६ जेठ, काठमाडौंः पोखरा महानगरपालिका-३१, माझीकुना नजिकै रहेको बेगनास तालमा पौडी खेल्ने क्रममा बेपत्ता भएका एक व्यक्तिको खोजी कार्य सुरु भएको छ।
गोरखा जिल्लाको शहीद लखन गाउँपालिका-३, मनकामना बस्ने ४३ वर्षीय राजेश श्रेष्ठ जेठ २५ गते साँझ तालमा पौडी खेल्ने क्रममा हराएका थिए। बेपत्ता भएको खबर प्राप्त भएलगत्तै सशस्त्र प्रहरी बल नेपाल नं. २४ कालिका गणबाट सशस्त्र प्रहरी निरीक्षकको कमान्डमा ७ जना गोताखोरसहितको टोली खोजतलासका लागि परिचालन गरिएको छ।
खोजी कार्यलाई तीव्रता दिइएको सशस्त्र प्रहरी बलका सह-प्रवक्ता डिएसपी शैलेन्द्र थापाले जानकारी दिए। खोजी कार्य जारी रहेकाले थप विवरण प्राप्त हुन बाँकी छ।
