एक लाख राशिको सगरमाथा पुरस्कार र ५० हजार राशिको तेन्जिङ–हिलारी पुरस्कार वितरण
काठमाडौँ — विश्वकै अग्लो हिम चुचुरो सगरमाथा कृत्रिम खुट्टाको सहायतामा आरोहण गरेका रोल्पाका हरि बुढामगर र २८ पटक चढेर सर्वाधिक आरोहण कीर्तिमान गर्ने सोलुखुम्बुका कामीरिता शेर्पालाई संस्कृति, पर्यटन तथा नागरिक उड्डयन राज्यमन्त्री सुशीला सिर्पालीले १६ औं सगरमाथा दिवसका अवसरमा सोमबार सम्मान गरिन् ।
सगरमाथा चुचुरोमा मानव पाइला पुगेको ७० वर्ष पूरा भएको अवसर समेत पारेर १६ वर्षयता पर्यटन मन्त्रालय लगायतका निकायले संयुक्त आयोजना गर्ने सगरमाथा दिवसका अवसरमा राज्यमन्त्री सिर्पालीले सम्मान प्रदान गरेकी हुन् । पर्यटन विभागले १ लाख राशिको यस वर्षको सगरमाथा राष्ट्रिय पुरस्कार संखुवासभाका आरोही सानु शेर्पालाई प्रदान गरेको छ । उनले सगरमाथासहित विश्वका १४ वटा ८ हजार अग्ला हिमाल दोहोर्याएर आरोहण गर्ने कीर्तिमान राखेका थिए ।
यसैबीच मन्त्रालयले यस वर्षको ५० हजार रुपैयाँ राशिको तेन्जिङ हिलारी पुरस्कार तीन जना आरोहीलाई प्रदान गरेको छ । यो पुरस्कार सोलुखुम्बुका आरोही पासाङ दावा शेर्पा र पासाङ ल्हामु शेर्पा अकिता तथा नेपाली सेनाका प्रमुख सेनानी किशोर अधिकारीलाई प्रदान गरिएको छ । पासाङ दावा सगरमाथा २७ पटक आरोहण गर्ने नेपाली हुन् । उनी कामीरिता पछि सर्वाधिक सगरमाथामा आरोहण गर्ने विश्वकै दोस्रो व्यक्ति हुन् ।
त्यस्तै तेन्जिङ हिलारी पुरस्कार प्राप्त गर्ने अकिता धौलागिरि हिमाल आरोहण गर्ने पहिलो नेपाली महिला हुन् । अन्नपूर्ण हिमाल आरोहण गर्ने पहिलो महिला आरोहीमध्येकी उनी नेपालको पहिलो महिला पर्वतारोहण प्रशिक्षक पनि हुन् । उनले विश्वका ८ हजार अग्ला १४ मध्ये नौं वटा हिमालको आरोहण गरिसकेकी छन् । त्यस्तै नेपाली सेनाका प्रमुख सेनानी अधिकारी सफा हिमाल अभियान तीन वर्षदेखि नेतृत्व गर्दै आइरहेका छन् ।
समारोहमा राज्यमन्त्री सिर्पालीले ७० वर्षयता कम्तीमा ७ हजार ८ सय ५० जनाले सगरमाथा आरोहण गरिसकेको बताइन् । उनले सगरमाथालाई थप सुरक्षित बनाउने बताउँदै आधार शिविरसम्म चाँडै सडक पुर्याइने बताइन् । यस वर्ष आरोहण दलका सदस्य र सहयोगी शेर्पाहरुसमेतले गरी करिब ६ सय हाराहारीले सगरमाथा आरोहण गरिसकेका छन् । विभागले एकिन विवरण आउन अझै एक महिना लाग्ने जनाएको छ ।
पर्यटन विभागका महानिर्देशक होम लुइँटेलका अनुसार, यसै वर्षदेखि सगरमाथा आरोहीलाई परिचयपत्र र ब्याच वितरण थालिने भएको छ । ‘१ सय ६५ वटा चाँदीका ब्याच वितरण सोमबार सगरमाथा दिवसको साइत पारेर सुरु गरिएको छ,’ महानिर्देशक लुइँटेलले भने ।
