विराटनगर । पूर्वाधार विकास कार्यालय, मोरङको अत्याधुनिक प्रशासनिक भवनको शिलान्यास भएको छ ।
सोमबार एक कार्यक्रमकाबिच कोशी प्रदेश सरकारको भौतिक पूर्वाधार विकास मन्त्री भुपेन्द्र राईले भवनको शिलान्यास गरेका हुन् ।
विराटनगर महानगरपालिका वडा नं. ५ मा निर्माण हुने सो भवन निर्माणका लागि ललितपुरस्थित निर्माण कम्पनी सिमवाली इन्कन जे.भी.सँग २ करोड ८४ लाख ६४ हजार लागतमा सम्झौता भएको छ ।
पूर्वाधार कार्यालय मोरङका अनुसार निर्माण कम्पनीसँग २०८२ साल असोज ७ गते दुई वर्षमा काम सक्ने गरी सम्झौता भएको हो ।
पूर्वाधार विकास कार्यालय मोरङले आफ्नै भवन निर्माण भएपछि सेवा प्रवाह थप चुस्त र प्रभावकारी हुने विश्वास लिएको छ ।
