काठमाडौं, भदौ ८ गते । ऋषिङ गाउँपालिका ५, राम्जाकोट तनहुँ स्थायी निवासी हाल अमेरिकाको नियुहाम्सा (वोस्टर्न क्षेत्र) मा वस्दै आउनुभएका डोलराज पोख्रेलले २५ हजार अमेरिकी डलरको चिठ्ठा जित्नु भएको छ ।
व्यावसायिक लोट्री (चिठ्ठा) मा उहाँले सो रकम जित्न सफल हुनुभएको हो । त्यसको नेपाली रुपियाँ करिब ३७ लाख ७५ हजार हुन्छ । अमेरिकाको एक व्यावसायिक पसलमा जागिर गर्दै आउनुभएका पोखरेलले अमेरिकाको सरकारी निकायबाट अनुमति लिइ खेलिने चिठ्ठा कार्यक्रममा विदाको समयमा सो चिठ्ठा खेल्नुभएको बताउनुभयो । उहाँलाई नियमितजसो दुई चार हजारका दरले चिठ्ठा परिरहँदा साथीभाइहरुले भाग्यमानीको रुपमा हेर्ने गरेका थिए ।
भाग्यमानी रहेको भन्दै साथीभाइले सुझाव दिँदा आफूले सो चिठ्ठा खेलेको र जित निकालेको उहाँको भनाइ छ । आफूलाई चिठ्ठा परेपछि साथीभाइले बधाई र शुभकामना दिइरहनुभएको उहाँले सुनाउनुभयो ।
