कैलाली, माघ २२ गते । कैलालीको धनगढी उपमहानगरपालिकाका प्रमुख गोपाल हमालले फोहोरलाई मोहर बनाउने कार्यमा अगाडि बढिरहँदा अन्य पालिकाले भने फोहाेर व्यवस्थापनको नाममा दुर्घन्ध फौलाइरहेको स्थानीयले आरोप लगाएका छन् ।
यो साता घोडाघोडी नगरपालिकाले फोहाेर व्यवस्थापनका लागि सामुदायिक वनमा थुपारेको फोहाेरमा आगो लगाउँदा आसपासका बस्तीमा नराम्रो असर परेको छ । घोडाघोडी, लक्ष्मीपुर, हिम्मतपुर मुक्त कमैया बस्तीका स्थानीयले फोहाेरबाट निस्केको धुवाँले दुईतीन दिन सास फेर्न, आँखा हेर्न समस्या भएको गुनासो गरेका छन् ।
घोडाघोडी गाउँका सुरेश ढकालले फोहाेरमा लगाइएको आगोको धुवाँले आफूलाई साह्रै अप्ठ्यारो पारेको बताउनुभयो । उहाँले दिउँसोको समयमा प्रदूषित धुवाँ माथि माथि फैलिए पनि रातीको समयमा हावाको वेग कम हुहा धुवाँ चारैतिर फैलिदा गाउँबस्तीका बासिन्दालाई श्वाससप्रश्वासमा समस्या भएको बताउनुभयो ।
पहिला पनि जङ्गलमा थुपारेको फोहाेरमा लगाइएको आगोको धुवाँले समस्या भएपछि हिम्मतपुर मुक्त कमैया शिविरका स्थानीय नगरपालिकालाई समस्याका बारेमा उजागर गरेका थिए ।
सिविरका सीतारानी चौधरीले पटकपटक जानकारी गराउँदा पनि नगरपालिकाले सुनुवाइ नगरेको बताउनुभयो । उहाँले वडा नम्बर १ वागेश्वरी सामुदायिक वनमा फोहाेरको डम्पिङ साइडमा लगाइएको आगोको दुर्गन्धित धुवाँले तीन दिनसम्म समस्या गरेको बताउनुभयो ।
घोडाघोडी नगरपालिकाले टेण्डर प्रक्रियाबाट फोहाेर उठाउने जिम्मा दिएको छ । साँडेपानी, सुखड, पहलमानपुरबाट उठ्ने फोहाेरलाई सामुदायिक वनमा फाल्ने गरिएको छ । विभिन्न सामुदायिक वनसँगको सहमतिमा फोहाेर फाल्ने गरिएको जनप्रतिनिधिको भनाइ छ ।
धनगढी नगरपालिकाले जग्गा भाडामा लिएर जम्मा भएको फोहाेर वर्गीकरण गरेर व्यवस्थापनसँगै आम्दानी गर्दै गर्दा छिमेकी पालिकाले फोहाेर व्यवस्थापनका लागि विगतदेखिनै दीर्घकालिन योजना बनाउन सकेको छैन ।
स्थानीय सागर ढकालले पटक पटक समस्याका बारेमा जनप्रतिनिधिलाई जानकारी गराउँदा पनि वास्ता नगरेको गुनासो गर्नुभयो । निर्वाचनका बेला जनताका पक्षमा काम गर्छौं भन्दै मत माग्ने जनप्रतिनिधिको हर्कतले स्थानीय निराश बनेका छन् ।
घोडाघोडीमात्र होइन, लम्कीचुहा, गौरीगङ्गा नगरपालिकालगायत स्थानीय तहले सड्ने र नसड्ने फोहाेर एकै ठाउँमा सामुदायिक वनमा जम्मा गर्ने र आगो लगाउने गरेका छन् ।
