टुँडालदेवीलाई पोखरीको परिक्रमा गराउदै युवाहरू।
काठमाडौंको हाँडीगाउँस्थित गहना पोखरीमा हरेक वर्ष मनाइने गहना खोज्ने जात्रा यस वर्ष पनि धुमधाम साथ मनाइयो । ऐतिहासिक महत्त्वको यस जात्रा नेवार समुदायमा लोकप्रिय छ । यस जात्रामा स्थानीय नेवार समुदायका युवाहरूले काँधमा टुँडालदेवीको पालकी बोकेर हराएका गरगहना खोज्ने गरिन्छ ।
किरातकालदेखि नै चल्दैआएको मानिने यस जात्रामा हजारौं युवाको भीड लाग्ने गर्छ । वैष्णवीदेवी पनि भनिने टुँडालदेवीलाई युवाहरूले पोखरीमा तीन पटक घुमाउँछन् । यस जात्रासँग जोडिएका किंवदन्ती अनुसार टुँडालदेवीका गहना खोज्न रथलाई पोखरीमा लैजाने चलन छ ।
यस जात्राबारे प्रख्यात कथनअनुसार छोरी भाटभटेनी आमा टुँडालदेवीलाई भेट्न जाँदा गोप्य सम्बन्ध रहेका पोडेसँग घुम्न हिँडेको देखिछिन्। यसबाट रिसाएकी भाटभटेनी राति नै फर्किँदा हराएको गहना प्रत्येक वर्ष यसरी नै खोज्ने गरिएको लोकोक्ति छ।
