काठमाडौं । देशभर चिसो बढ्दै गएको छ । तापक्रम क्रमशः घट्दै छ ।
मौसम पूर्वानुमान महाशाखाका अनुसार आज काठमाडौं उपत्यकाको न्यूनतम तापक्रम ३ डिग्री सेल्सियस मापन गरिएको छ । महाशाखाका मौसमविद् विनु महर्जनका अनुसार बिहान पौने ९ बजेको यो तापक्रम काठमाडौंको यो वर्ष आजसम्मकै कम हो । काठमाडौंको हिजो बिहानको न्यूनतम तापक्रम ४।६ डिग्री सेल्सियस थियो ।
यसअघि, यही पुस १३ गते काठमाडौं उपत्यकाको न्यूनतम तापक्रम यो वर्षकै कम ३।१ डिग्री सेल्सियस थियो ।
आज जुम्लाको न्यूनतम तापक्रम माइनस ५।५ डिग्री सेल्सियस मापन गरिएको छ । महाशाखाका अनुसार यस दिन डडेलधुराको न्यूनतम तापक्रम २।९, ताप्लेजुङको ३, वीरेन्द्रनगरको ३।१, घोराहीको ४।३, दिपायलको ४।८, पोखराको न्यूनतम तापक्रम ५ डिग्री सेल्सियस छ ।
महाशाखाले हरेक दिन बिहान न्यूनतम र बेलुका अधिकतम तापक्रम मापन गरी विवरण सार्वजनिक गर्ने गर्छ । हाल देशमा पश्चिमी न्यूनचापीय प्रणालीको आंशिक प्रभाव रहेको महाशाखाले जनाएको छ ।
